آنا علي و جدي علي و السيف واحد من هلي ...بويه

أستأذنك أول بني هاشم تربيتك آنا و عالحرب عازم

أول مضحي من الولد لازم أبرز قبل عمي و قبل جاسم

إرخصني مل من غمده هالصارم خلي العده تسأل منو القادم

من رخصتك و إسمح إلي آنا المضحي الأولي...بويه

آنا إبسماواتك سطع نجمي من اسم أبوك المرتضه إسمي

محد يعلمني الحرب علمي عالفطره أطعن و أضرب و أرمي

هالحومه موطن همتي و عزمي و المصرع أصبح عاصمة دمي

إرباة الشجاعه إبمنزلي و الغيره روح إبداخلي...بويه

غارات رهبه إترجف العسكر فنها الدروع إتردني لو تقدر

لو ينبني إقبالي حصن خيبر راح أشمر الباب إبعزم حيدر

حقه اللي يسمع إسمي يتحير إتقول الوصي إبطف كربله إتكرر

للقاع أقلها إتزلزلي بكثر الضحايه إتحملي...بويه

خليني أشّوفك بالحرب فنّي قلي كفو ما خيبّت ظني

صوت السيوف إشما قرب مني يطربني و أهتف إي بعد غنّي

رغم الجروح أضحك و لا جّني مو آنه من يتأثر إبدني

آنا الأقرر ما يلي إبرمحي الجماجم تمتلي...بويه

يا راس أقطعه إبسيفي حاجيني حاضر أقلك بويه من عيني

لو بكر إبن غانم يلاقيني ما يرجع إلا و راسه بيميني

منه الهديه وشتجازيني ماي العذب أتمنه ترويني

بالعطش ناري تصطلي و إنت فراتي و منهلي...بويه

يا بويه لو موتي إلي إتدنه جسمي سيوف الهم يوذرنه

أتمنه أشوفك يمي أتمنه إتغمض إعيوني إتسكن الونه

من ترجع الأمي يالمجنه قل إلها إبنج رايح الجنه

الجنه صارت موئلي قلها يليله هلهلي ...بويه

تحضرني بالمصرع يبعد هلي بعدك عله الدنيه العفه إتقلي

خدك على خدي و تون لجلي إتشمني و عله إجروحي الدمع يهلي

لو بيه حيل أنهض لك إبكلي قطع البواتر بيه شمخلي

و الألم ساعه و ينجلي و الربها روحي تعتلي...بويه

لو ناوي جسمي إتشيله بالمصرع نادي الهواشم خل تجي و تفزع

مو وحدك إتشيله تره إمقطع ترفع كتر ثاني كتر يوقع

ميهمني لو أوصالي تتوزع كل خوفي قلبك بويه يتصدع

إبهالحاله يشمت عاذلي غيضك يفور و يغتلي...بويه