خيّم الليل إبظلامه ...و آنا أدور عاليتامه

يلعب الصوت إعله متني...خويه يا ريتك شفتني

ليه مهرك من لفاني يصهل إبصوت الظليمه

بالمهر خويه تعلق جم يتيم و جم يتيمه

جنه يبن أمي يقلي لمي أيتامه و حريمه

من بعد ساعه يزينب للحرم ما تبقه خيمه

و آنا ما أدري إشدهاني...و إنعقد خويه لساني

و لمن الخيل إعتنتني...خويه يا ريتك شفتني

خويه نارين الولتني و أطفي يا نار السريه

نار البقلبي إعله ضيمي لو لهب نار آل أميه

و غير الب إذني أسمعه إيسب علي حامي الحميه

إبصبري أتجلد يخويه إوحيده وشيوقع بيديه

و آنه من طيحت جفيلي...قومه ما بيه إعله حيلي

و إنت لو يمي عنتني...خويه يا ريتك شفتني

أطفالك العندي أمانه إبهجمت القوم إفقدتهم

خويه و إخيول آل أميه بالحوافر سحقتهم

و البقوا منهم يخويه ساعة الشردوا شفتهم

سلمت شمس المناحه و إعتنيت دورتهم

يا طفل أتدنه يمه...إينادي من خوفه يعمه

و هالمصيبه الشيبتني...خويه يا ريتك شفتني

طفله من بين اليتامه ضيعتني و ضيعتها

شبت النار إببدنها و شاطت الحومه إعتنتها

و من وصل ليها خبرها آنا يبن أمي إتبعتها

أعثر إبين الضحايه و تبجي يم جسمك شفتها

إتنادي بويه اليوم أريدك...قلي يا هو الحز وريدك

مانا طفله و يتمتني...خويه يا ريتك شفتني

قومي قلت إلها يعمه عالقدر إحنه إشبيدينه

إتقلي وديني لعمي الكافل بإسمه الضعينه

حته لو مني تعذر آخذ إيساره و يمينه

و بيهن إنحامي خدرنه لو عدونه رايد يجينه

إجفوف أبو الغيره خيمنه...إنقطعن و إحنه إنهضمنه

هاليتيمه ذكرتني...خويه يا ريتك شفتني