شهر عن سلمان و إتعنيته حسين يمك ليش ما حضريته

إنت سيف الله و رحمته و نقمته إنت جبرائيل كاشف كربته

إنت حته آدم حضرته إبتوبته ليش أبو السجاد ما نصريته

إنت عين الله و عله العالم نظير إنت كل الخلق بأوصافك تحير

عقب ابن عمك فلا غيرك يصير إنت موجة نوح و النجيته

انته لله داعية حگ او دليل او للنبي غيرك أبد ميصح مثيل

انته انته البرَّدت نار الخليل إيفور قلب حسين ما بخيته

إنت جنة الله و ناره و العذاب إنت حم الهده و ذاك الكتاب

إنت و الله الترجم الموسه الجواب ليش صاح حسين ما سمعيته

إنت ذاك البإسمك الباري قسم قاف بالقرآن مع نون و قلم

إنت عيسه امن الصلب بإسمك سلم و سهم جبد حسين ما منعيته

إنت بيك اتحيرت عشر العقول يا مدير الفلك يا زوج البتول

إنت كم شده إكشفت عن الرسول إشلون حاطوا بإبنك و خليته

إشلون حاطوا بإبنك إبذيج الصفوف يا علي و يهنيك فعله إويه الألوف

إنت و الله إبكربله حاضر تشوف إشفعل بإبنك الخيل الدخريته

يا منيع الجار يا عز الدليل يا مطوع الجان يا حامي الدخيل

إشلون صبرك و إنت تنظر للعليل إمقيد و مجتوف ما فكيته

إنت حلال المشاكل من تضيج إنت ما يبعد عن إحصانك طريج

إنت حكم النار بيدك و الحريج بالمخيم نار ما طفيته

و المصيبه اللي يذوب إلها القلب ممشه و العليل إويه الغرب

و إنت بالعاده التجدل بالحرب شتم زينب للشمر عديته