غدروني يا بو اليمه...سموني يا بو اليمه

غدروني...سموني...ظلموني

يبو اليمه أخبرك بالجرالي ...و أسولف محنتي و همي

إنظر يا عضيدي الهذا حالي...مسموم آنه يبن أمي

قربت ساعتي و قربت آجالي...رقد حيلي و نحل جسمي

هالظالم جار إبظلمه...عالوادم جار إبظلمه

غدروني...سموني...ظلموني

يبو اليمه إنقطع جبدي إبغدرهم...و بالسم هالصبح مطعون

باجر شنهو يم ربهم عذرهم...و للزهره إشيقولون

إشيقولون النبيهم لو سإلهم...إبيا عذر يتعذرون

بالمحشر شنهو إتقدمه...و الحيدر شنهو إتقدمه

غدروني...سموني...ظلموني

يبو اليمه القلب جانونه يسعر...و سرت نار الألم بحشاي

بأثر سم العده ذاب و تفطر...و نفذ خويه إبجميع إعضاي

شاهد حالي يبن أمي تغير...لله وجهت شكواي

من سموا جبد العصمه...ما رحموا جبد العصمه

غدروني...سموني...ظلموني

يبو اليمه أوصيك إبوصيه ...هاي العايله بحماك

ابعهدك تبقه هاي الفاطميه...مثلما والدي وصاك

بعد ساعه و تفارقنه المنيه ...ما أحمل هضم فرقاك

دلالي إيعيش إبهمه...يا حالي إيعيش إبهمه

غدروني...سموني...ظلموني

صبرك عالمحن يحسين صبرك...يخويه و محنتك أكبر

يخويه إبكربله إيقطعون نحرك...و يغسلك دمه المنحر

و بالخيل العده إيسحقون صدرك...و صدرك خويه يتكسر

و إتغدرك هاي الأمه...إتقص نحرك هاي الأمه

غدروني...سموني...ظلموني