جثثكم عالأرض ظلت رميه...و دفنكم يا هلي يصعب عليه

يا حيدر يا حماي...لو تقدر قوم إوياي...يصعب عليه

صافن كل جزء بالكون داري إبحيرة الصفنه

من شاهد علي السجاد و الدمعه إبوسط جفنه

إبيا قطعت نسيج إتلوق يلف حسين و يجفنه

إبيا حاله يشيل النور عن القاع و يدفنه

المصيبه و دفنته لحظه رهيبه...دفنته و عاشت إويايه المصيبه

و إتأثر قلبي إبهاي....لو تقدر قوم إوياي...يصعب عليه

أخويه إشلون أدفنه إشلون يحيدر هالأمر يصعب

كوكب عالأرض مطروح و بعطر السمه إمخضب

تقطع جسمه بس من طاح كل قطعه إصرخت زينب

جبينه إمترب و حسين جبين المصطفه إمترب

شبيه المصطفه اليحمل صفاته...ذبيح و غربت كمرة حياته

و إمطبر فت إحشاي...لو تقدر قوم إوياي...يصعب عليه

معنه الآيه بالقرآن جعل بالماي كل شي حي

و الواجب عله العباس يقدم للعطاشه المي

إذن شخصه حبل ممدود ما بين العطش و الري

القمر داس الشريعه و طاح و إتلاقه النهر و الضي

دخيلك يا علي و إشلون أدفنه...إذا كل البخت لايد إبجفنه

هالمنظر جنب الماي...لو تقدر قوم إوياي...يصعب عليه

حين اللي دفنت حسين سمعت إحجايه من نحره

يطلب جسد عبدالله يتوسد على صدره

نفذت الطلب بالحال لبويه و طاوعت أمره

رضيع حسين فوق حسين مددته إبوسط قبره

فجيعه يا علي و الله فجيعه...أبويه و يندفن وياه رضيعه

شتصبر ضاع الراي...لو تقدر قوم إوياي...يصعب عليه

طويت الأرض يا جدي و روحي الحزن ضاهدها

تميل و تصل لجدامي بس الصبر يسندها

لأن زينب بقت بالضيم ويه العيله وحدها

لا أقدر أرد ليها و هيه إشلون شيردها

وحيده أم الحزن ظلت وحيده...و عله زينب يحيدر مو جديده

وسط البر يا مولاي...لو تقدر قوم إوياي...يصعب عليه