ابيا حال من عفتوني...يحسين فارقتوتي

إميسره للشام...رحت بالأيتام

يحسين فارقتوني

يحسين شحجي لك و كل قلبي إجروح

و لو غيري ما لليوم ظلت بيه روح

بالسهر قضيت أربعينك و النوح

من جان يدري العائله إيساره إتروح

بخيال ما شافوني...و بصوت ما سمعوني

و لني مسبيه ...عد بني ميه

يحسين فارقتوني

و إشلون شاعت يا غيور الأخبار

زينب الكبره إمخدرة حامي الجار

تمشي يسيره إبولية انذال أشرار

لو جنت حي يحسين هذا ما صار

ما جان يتولوني...الأنذال و يهضموني

الأهل مو يمي...و ضعت يبن أمي

يحسين فارقتوني

شتشوف خويه القوم عدنه شتشوف

أيتام تتلاعه و حرم كلها إبخوف

و شافت كفيل الضعن ما عنده إجفوف

شافت عليل إويه الأرامل مجتوف

و إشلون يحترموني...عدوان ميهيبوني

هيبتي عباس...ما عليه ظل راس

ذاك الأخو اللي جان راصد خدري

عالنهر ودعته إبمدامع تجري

راحت الرايه و الأخو ما يدري

من عقب جفه جف عدوه إبصدري

و إسياط فوق إمتوني...بجفوف ذل دفعوني

صوت روعني...إجفوف تدفعني

سوط اليجيني إبجفي قمت أتلقاه

و أنخه أبو فاضل و لمن أنخاه

إيقلي العدو فوق النهر خليناه

إجفوفه قطعناها الراس إهشمناه

شمات و يحاجوني...بإلسان شر نادوني

قمر هاشم طاح...عالشريعه و راح

يحسين فارقتوني

لو صحت يحسين بألم صاحوا وين

حسين التندبيه عالرمح راس حسين

و أشبح له عد راسك يبو اليمه العين

و ناديت يبن أمي عفتني ما بين

هالناس ما رحموني...و إنخيت ما حشموني

و بشماتتهم...غدت وليتهم

يحسين فارقتوني

يوقف إقبالي الشمر ما يتهيب

إيناديني جاوين إخوتج يا زينب

عريسكم وينه إبدماه إمخضب

حوفة زفافه إبنار قامت تلهب

يحجون و يذكروني...إيعيدون إشما راوني

يذكروني إشموع...عرس صار إدموع

يحسين فارقتوني

إيروح الشمر غير الشمر يلفيني

يسألني وين الأكبر إيحاجيني

إيذكرني ابشاب النظرته إبعيني

و إلمست طبرات الجسم بيميني

هالشاب بيه فجعوني...لليوم بين إعيوني

ما نسيت إمصاب...كل أخو كل شاب

يحسين فارقتوني