عباس حامي ضعنه...عباس رجوت أملنه

للماي قالوا تعنه...عباس حامي ضعنه

كل طفل ظل إيردد ابهالجلمه

إيلوج إبعطش قلبه و يفور إبدمه

إمن الخيمه مشبوحه لعيون العمه

و الأمل كل ساعه و يجي إعله يمه

و إتصيح قامت إسكينه...الله و أكبر ضمينه

عباس وينه يهلنه ...عباس رجوت أملنه

صاحت قبل ساعه إقبالي موجود

عمي و زينب سلمت بيده الجود

قالت له يا با الفضل يومك مشهود

و بمثل هذا اليوم وصاك العود

هالجود جان إويه عودك...و اليوم صار إبوجودك

وشقال والدك عنه ...عباس رجوت أملنه

قالت له سولف يو دريت إبهالحال

من العطش قامت تموت الأطفال

و إعليك معقوده جميع الآمال

نعطش إشلون و عندنه مثلك خيّال

و موجود جودك إويانه...يا خوي تدري بضمانه

عباس ساعه و قتلنه ...عباس رجوت أملنه

قالت اسكينه شفت عمي إبعيني

ناده يزينب رايح و شوفيني

الوعد ساعه بينج و ما بيني

و أسقي العطاشه و بالخيم تلقيني

و العين تربي إعله دربه...و الماي يمته نشربه

منقول أيسنه منه ...عباس رجوت أملنه

إسكينه بأملها و زينب التربي العين

و بكل أمل ما تشعر أطفال حسين

تلقاها ملتمه إعله زينب صوبين

و كل طفل يصرخ وين أبو فاضل وين

ما راح واحد يخبره...و يشوف غايته و فكره

و إنخاف ما يرجع إلنه ...عباس رجوت أملنه

و زينب إبحيره و بقلب يتصدع

تطلع امن الخيمه و تشوف و ترجع

شتسكت المرضع تجي لليرضع

وين التريد إتروح ضجه تسمع

و لن هاي تحمل طفلها...و إتشوف تندب أهلها

و إتصيح يهل المَحّنه ...عباس رجوت أملنه

هذا طفل بالمهد يلعي إتخليه

تلقه طفل ثاني تجي تنظر ليه

إيدور رمل بارد يحط قلبه إعليه

هذا بأمل عمه تجيه إتسليه

و إقبال زينب ينادي...بضماي بورح أفادي

أطفال يبست لِسّنه ...عباس رجوت أملنه

قام الطفل من يحس واحد يمه

إيشب إبلهفته إيظن إجه ليه عمه

إيفك عينه لن ينظر إجت ليه أمه

يسألها عن عمه و يحس إبصدمه

و إشلون عمي نساني...و إضماي يبّس إلساني

أتناه لو ما كو ظِنه ...عباس رجوت أملنه