آه يبني ابحنتك... لا شمع لا ياس

آه يبني إبزفتك... ألطم عله الراس

دمك إيعطر إثيابك...تنطفي شمعة شبابك

كل سنه التكمل إبعمرك أشكر الرحمان

يبني و اتأمل أشوفك هيبة الشبان

فرحة الأم الإبنها إلها هالعنوان

إتشوف صحبانه تزفه إبفرحه للصيوان

إتحني له الجفوف...الهالأمنيه إتشوف

عرسك إنت إبكربله ما كو مثاله

مو هلاهل نوح أرامل و الثكاله

تنطفي شمعة شبابك...تنطفي شمعة شبابك

ابكربله و عندي وصيه إلك أحجيها

والدك قلي يرمله ذمه خليها

من يجي عاشر إمحرم لبني تنطيها

فرحة إسنينج بإبنج غاب دفنيها

يرجع للخيام...بس جثه جسام

إبكربله أعرف بالحزن ينتظرج إسنين

فدوه لحسين الإبن يستاهل حسين

شسأل و أعرف جوابك...تنطفي شمعة شبابك

اليوم يا سباح قلبي يا شريك الروح

نوصل العشره إبمحرم يعني يوم النوح

الله يدري إشلون باجر جم حمل مطروح

إشلون أتخيل أتركك عالثره مذبوح

بالغاضريه...يوم المنيه

إبثقل همي وونتي و أتخيل الحال

مو بيدي سهم الزمن يوليدي جتال

من يوج جمرة مصابك...تنطفي شمعة شبابك

إبسبي و للعاشر حنيني أخذ قلبي إوياه

إبلا وعي أحجي إويه روحي آه واويلاه

إهنا يروحي قعد جاسم جان يمشي إهناه

إهنانه جانت خيمه يمكن هذا أثر ممشاه

صير بمكاني...شوف إشلفاني

و آه يبني إشقد صعب طف المنيه

رحت عني و ما بعد ترجع إليه

كربله طبقت كتابك...تنطفي شمعة شبابك