عباس آنه و تدري الناس...و اليوم أقسم بالعباس

حتماً أملي الجود

عباس و حيدر سماني عباس و يدريني إبهاي

بوجوه أهل المنكر عابس غاضب و السيف بيمناي

لو كل الجيش إعله الشاطي أقلبهم و أوصل للماي

أشري الماي إبدم المنحر و أسقي العطشانه من إدماي

ما تمنعني إحدود...أوصل للمقصود

خل إتجربني الأرجاس...و اليوم أقسم بالعباس...حتماً أملي الجود

آنه إويه الجود إويه الرايه متعاهد للشاطي إنروح

أنزع روحي و ما أنطيها لجل الرايه إتهون الروح

هالرايه إحجاب إختي الحره و افديها إبدمي المسفوح

ما توقع إلا و راعيها ينزف عالشاطي و مطروح

إلا أوقع ممدود...دامي إبلايه إزنود

من ضربة عامود الراس...و اليوم أقسم بالعباس...حتماً أملي الجود

آنه إنطيت إختي المهيوبه جلمه وواعدت الأطفال

أرجع بالماي امن الشاطي و أتحده إبيمناي إرجال

عباس و عهدي إيعرفونه مو بس جلمات و تنقال

و آنه إعهودي إعهود...هاي إزنودي إشهود

أوفيها القطع الأنفاس...و اليوم أقسم بالعباس...حتماً أملي الجود

عباس و بالغيره إحزامي و إتخاف إمن إسمي الأشرار

لو ما عباس إيسموني ما أرضه بإسمي إشما صار

أمي إعله الغيره إمربيتني و إتلوليلي الثار الثار

رايدتك بالطف يوليدي يوم حسين البيه يحتار

بالدم كون إتجود...لو بالماي إتعود

وصتني إبفيض الإحساس...و اليوم أقسم بالعباس...حتماً أملي الجود

حتماً و الحتماً محتومه مكتوبه إبلوح التقدير

لو ما أجيب الماي إبجودي زلزال ابهالطف يصير

لو دم لو ماي امن الشاطي و بجفي راية خير

تشرب ماي إبزود...باليوم المشهود

مني و تتنومس نوماس...و اليوم أقسم بالعباس...حتماً أملي الجود