ليله وحده... لو تظل ليله وحده

يوفي وعده ...المنتظر يوفي وعده

و إنتظرته... قلت له يمته...نلتقي يم الجواد

إنطوت صفحة عتابي آمنت بالإنتظار

و بكثر ما جنت أعاتب قدمت لك إعتذار

جيت أزور الكاظميه و ألتفت يمنه و يسار

يا تره ممكن أشوفك ليله و أبجي لك نهار

حاضر إنته... ما غبت حاضر إنته

موسه شفته... و الرضه موسه شفته

من ينادي... علي الهادي... تهتز السبعه الشداد

و إنتظرته... قلت له يمته...نلتقي يم الجواد

من أرض طوس الغريبه تبتدي رحلة عذاب

و بأرض سامره موكب يشعل إشموع الشباب

ابحضرة الكاظم يمهدي يلتقون إبهالمصاب

صاحت أرض الكاظميه كافي يالمهدي غياب

عاشرتنه... الفاجعه عاشرتنه

عذبتنه ...غيبتك عذبتنه

إبهالرزيه... الغاضريه ...و النجف تعلن حداد

و إنتظرته... قلت له يمته...نلتقي يم الجواد

و الله يالمهدي الحضورك يدعو كل هذا الحضور

يا إلهي بالزجيه عجل إبيوم الظهور

هالمصيبه الألمتنه نلطم إبلايه شعور

دمعة الزاير غريبه و إنت يالمهدي غيور

يا محمد ...يا علي يا محمد

جرحي يشهد... ما نمت جرحي يشهد

ما كو راحه ...بس مناحه... لايق إعليَّ السواد

و إنتظرته... قلت له يمته...نلتقي يم الجواد

إستوطنت بيه المآسي و الدمع أصبح خليل

و الحزن لو حط رحاله يلغي قانون الرحيل

من كثر حزني و مصابي إشما أسولفلك قليل

و إنت آخر أمل عندي لا تقل لي مستحيل

رافع إيدي ...بالصحن رافع إيدي

يا نشيدي... إبكل فرض يا نشيدي

إبقلبي لهفه... يمته تصفه... يستقر وضع البلاد

و إنتظرته... قلت له يمته...نلتقي يم الجواد

أشتعل جمره إعله جمره أذن إبجرحي بلال

آني ما أقدر أقلك غير بس جلمة تعال

جم تعال و ما تجيني و كل شهر يطلع هلال

غيمه روحي من المدامع تنزل الدمعه بسؤال

ما أعوفك... يا جرح ما أعوفك

وين أشوفك ...يا حلم وين أشوفك

و إبكرامه ...و بسلامه...إبحكمك إتعيش العباد

إبحضرة الكاظم حضرنه و الرضه راعي العزاء

و لازم الزهره الحزينه تحضر إبهذا اللقاء

لو بني العباس تحضر تسمع أصوات الولاء

خل يشوفون السياده إلمن إيدوم البقاء

وينه وينه... المعتصم وينه وينه

ما درينه ...إبيا كتر ما درينه

من يخبره... ما نذكره...لا ندور بالرماد