لعد قبرك قصدنه ...يعزنه و يا سندنه

يمن فقدك ضهدنه

صوت النوايب و المحن نادينه و المدمع سال

فقدك يبو محمد صعب لو بالصخر جان إنزال

شيعتك إحنه و منقطع من عدنه هرش الدلال

يالوالي من يوم إنمرد جبدك إبسم الجتال

وجودك من فقدنه...المرد جبدك مردنه

يمن فقدك ضهدنه

يمك يسبط المصطفه إفرشنه القلب هذا اليوم

جينه إبمآسينه نون راح الإمام المسموم

راح اللي مصدر للكرم جان و سند للمحروم

و كل المساكين أصبحت تبجي و مدامعها إدموم

تنادي يا عمدنه...إسبب ما تبقه عدنه

يمن فقدك ضهدنه

أيتامه من بعده أصبحت تهمل دمه عيناها

مذهوله من عظم الجره و متكدره ابدنياها

متلوعه و متدوهنه بس فارقت رجواها

ظلت حزينه و حايره تنحب على مولاها

مصاب الهدها هدنه...الألم فطّر جبدنه

يمن فقدك ضهدنه

و حسين باللوعه هتف خانت إويايه الأيام

يا خويه عقبك و الدهر تدري رماني بسهام

عمرك قضه إبسم الغدر من هالأعادي ما دام

و إجروح قلبي إبفرقتك هيهات أبد ما تلتام

منو بعدك ضمدنه...يخويه الدهر ضدنه

يمن فقدك ضهدنه

أم المصايب تنتحب ابهالفاجعه مهمومه

حين اللي شافت بالطشت جبدك تسيل إدمومه

مصيوبه مهجتها و تظل من شوفتك محرومه

من شاهدت غدر الحقد سلّط عليك إسمومه

تصيحن و حق جدنه...لتتركنه الوحدنه

يمن فقدك ضهدنه

فارقت روحك و إنختم عمرك وسف بالأتراح

و حسين صوب المصطفه إبنعشك يمولانه راح

لاجن العدوان إرفضت هاللي إتبعت حكم أشباح

بسهام سبعين النعش صابوه و زادوا الجراح

إعتده القوم إعله حدنه ...و صفت كثره شددنه

يمن فقدك ضهدنه

ننشد بالالام و محن و الدمع منه إتجاره

عن قبر أمك فاطمه و عن قبرك و آثاره

موجود لو قوم العده شنت عليه الغاره

ننشد إبلوعات و ألم عن محسن و أخباره

العدو رايد يصدنه...و سلب منه مجدنه

يمن فقدك ضهدنه