هاليوم أعلن...آنا المؤمن ...و بدرب الأطهار إمشيت

عهدي إتوثق...ما يتوفق ...كلمن حارب أهل البيت

أهل البيت الحبل الممتد بين الخالق و الإنسان

حبهم مفروض من الباري دونك آيات القرآن

هالك بالدنيه الحاربهم و إبيوم المحشر خسران

دونك ابن إزياد و تابع شوف الحجاج و مروان

هاي الزمره...صارت عبره...و آنا بهالمبدأ ناديت

ما ريد أطعن...الله يلعن ...كلمن حارب اهل البيت

شوف الناس العافوا حيدر زمره و مجموعة أشخاص

غايتهم تضليل الأمه كلها إختلطت عام و خاص

باطنهم أحقاد و ذله ظاهرهم طيب و إخلاص

للإسلام أعظم ما قدموا كشفت سوءة ابن العاص

آنا الساعي...فكري الواعي...نظره إعله التاريخ إلقيت

شفت الحاصل...يخسر فاشل...كلمن حارب اهل البيت

شوف الناس الدفعوا جعده إبسم غدرت شبل الضرغام

من عقب السم نعشه إتشجر ضربوا عالجثمان إسهام

وين الناس الضربوا نعشه بجهنم مثوه الظلام

هالمسموم إتقدس إسمه و إتخلد طول الأيام

أشعر بالسم...قلبي إتألم ...شلت إيدي و بالدمعه إدعيت

يا رب عاقب...يا رب حارب...كلمن حارب اهل البيت

أحجي الحق ما خايف منك و اليحجي الحق ليش إيخاف

هذا الطف و إبعينك عاين خيل و أرماح و أسياف

وين حسين و قلة قومه ووين الجيش البلآلاف

حسين إسمه ابعرش الله إتسجل و بجهنم ذيج الأجلاف

وذروا جسمه...هدروا دمه...دم نحري إتفايض يا ريت

سفاك الدم ...إبنار إجهنم...كلمن حارب اهل البيت

عقب حسين إعياله إتيسرت للكوفه إبجور و أحقاد

و إنشوف السجاد إمكّبل يرسف بأغلال و أصفاد

شوف الحكمه الربانيه خلّد تاريخ السجاد

و حته القاع النمشي إعليها ظلت تلعن ابن إزياد

هذا الآثم...مجرم ظالم...و إنشلت إيده إتمنيت

لتظن يفلح...لازم نفضح...كلمن حارب اهل البيت

عترة هادينه العادوهم فشلوا ردوا عالأعقاب

أخزاهم ربك بالماضي حاضرهم موت و إرهاب

زمره و بإسم الدين إتسلب تذبح تسفك دم إرقاب

يا رب إلعن كلمن فجّر و هدم مرقد للأطياب

أهل العصمه...كنز الحكمه...دعوتهم بالدم لبيت

و الدم سجّل...لا شك يفشل...كلمن حارب اهل البيت