عله المسموم مهمومه...الحسن مظلوم من يومه

إذكرت إبني...و كثر حزني...الحسن مظلوم من يومه

أنا المظلومه يا شيعه و إلي بصحن الجبد نارين

تشب لجل الحسن وحده و تشب وحده المصاب حسين

فرق ما عندي بولادي و آنا إشعندي غير إثنين

الحسن روحي و أعز منها و حسين أغله من العين

لجن هالليله أرد أعتب و أعاتب شيعتي الطيبين

عله حسين الدمع تجروه و جنكم للحسن ناسين

الحزن لحسين و ايتامه...الحسن ناسين آلامه

صدق ظني...و كثر حزني...الحسن مظلوم من يومه

ملامه بالنفس ظلت تريح النفس من تظهر

يشيعه و لا تظنوني ميولي للحسن أكثر

الحسن ما فرقه عن حسين بنيني و كلهم أتفاخر

مصيبة كل ابن منهم سعير إبمهجتي تسعر

لون قلتولي عن حسين ذبيح و عالثره إموذر

الحسن هم وذروا جبده إمن أذكره الحاله تتغير

القلب مفجوع تدروني...أصب إدموع خلوني

النحب فني...و كثر حزني...الحسن مظلوم من يومه

لون قلتوا إعله راس حسين ذبيح و بالطشت خلوه

الحسن هم بالطشت جبده تخاذف ساعة الوذروه

أريد أوصيكم الليله و طلب يا شيعتي إتسمعوه

أريد إشما تذكرون الحسن و إمصيبته إتذكروه

ثجيله إمصيبته إعليَّ إمام إبلا ذنب غدروه

و الأصعب و أشد من هاي لون يا شيعته تنسوه

أصب إعليه دمعاتي...و لا تكفيه عبراتي

يألمني...و كثر حزني...الحسن مظلوم من يومه

يشيعه و الدعت روحي إبلهيب المحنه مستعره

إذكرت إبني الحسن لمن قضه و أيتام إله إتنظره

لون قلتولي عن حسين إنذبح و إعياله منذعره

وقع بالطف إجت يمه الرباب إتقبله إبنحره

لجن إبني الحسن أصعب ابهالحاله و أشد أمره

عوض ما زوجته إتواسيه و لن زوجته إتغدره

ابن ذبحوه عدوانه ...و ابن غدروه أعوانه

إبهضم لني...و كثر حزني...الحسن مظلوم من يومه

بعد يا شيعه أخبركم خبر خله القلب ينضام

إذكرت إبني الحسن لمن إعله نعشه حاطت الظلام

لون قلتولي جبد حسين السهم صابه و ترك آلالام

الحسن مثله إنضرب نعشه و يا ميت رموه إسهام

لون قلتولي شاف حسين بنينه إعله الترب أجسام

الحسن هم حضر لرض الطف و شاف إعله الأرض جسام

الهضم يزداد و اللوعه...عله الأولاد مفجوعه

إشظهر مني...و كثر حزني...الحسن مظلوم من يومه