إخذ دمع النواظر ...ياللي رايح للحبايب

أمانة و خلي جرحي ... يحجي آلالام المصايب

أنا إبدمعي البجيته...بقيع إلهم بنيته...إخذ دمع النواظر

تمنيت الأحبهم ما يبعدون ...تره بغيابهم ما تسوى العيون

بجيت إشقد بجيت و ما يرجعون ...و لو أهل المواقف ما يموتون

أريد أحمل جروحي ...و المدامع و أمشي ليهم

أهل نخوه و حميه ...بالشدايد أعتنيهم

حزنهم ما نسيته...بقيع إلهم بنيته...إخذ دمع النواظر

أمين امن المصايب ثقل الهموم ...أسد تحت التراب إيطول النوم

أشاهد جم حبيب القبره مهدوم ...و أنادي يا علي نبنيها يا يوم

قبور الهدموها بالضماير شيدوها ...وصيتك يا محمد بالولايه خالفوها

و أنا قلبي هديته ...بقيع إلهم بنيته...إخذ دمع النواظر

يبو الكاظم أريد القبرك أسعه ...أنادي يالغريب و يمك أنعه

أريد أعلق إرموش العين شمعه ...و أظل أبجي لمن ما تبقه دمعه

أريد أشرح مصابي ... و أشتكي لك ما جرالي

و أريد إبجي إعله قبرك ... حته لو قالوا مغالي

دمه المنحر فديته ...بقيع إلهم بنيته...إخذ دمع النواظر

أدور بالبقيع أربع أسامي ...و أنادي يالحبايب قلبي ضامي

يعيني شوفي قبره و لا تنامي ...حلم عمري أقبل قبر إمامي

أتيه بأمنياتي ...و بجراحاتي القديمه

يقلبي ليش أكابر ... من تشب نار الهضيمه

يصبري الما لقيته ...بقيع إلهم بنيته...إخذ دمع النواظر

قبر بس بالعلامة و أعتني ليه ...أصيحن يا إمامي و أنحب إعليه

لجن قبر الزجيه وين ألقيه ...أعاتب يا علينه ليش تخفيه

يا حيدر يا حبيبي ... و آنه حلمي بس أشوفه

نهاية كل عذابي ... لو سبع مرات أطوفه

رغم دهري و أديته...بقيع إلهم بنيته...إخذ دمع النواظر

إذا قبر النبي يوصل له زاير ...يكثرون الفتاوه إعله المنابر

حجوها إشقد تعبدون المقابر ...نواصب ما يملكون المشاعر

حقدهم ما منعنه ... مو جديده هالفتاوه

علينه قرروها ...بالسقيفه هالعداوه

كتاب الله قريته ...بقيع إلهم بنيته...إخذ دمع النواظر

يضيعون القبر عني و عرفته ...نبض قلبي يدليني ووصلته

كرهني الناصبي و آنه كرهته ...قبلت المرتضه و غيره رفضته

أمير إبقلبي عرشه ... و يحكم العالم أميري

أهل بيت النبوه ...يبقه حبهم في ضميري

كلام الحق حجيته ...بقيع إلهم بنيته...إخذ دمع النواظر