هالليله شفت صوره صابت قلبي المسهد

حمامه من المدينه جت حمامه من أرض مشهد

قالت يا حمامه ليش إجيتي و سمعي المقصد

رساله عندي مبعوثه من أبو محمد لأبو محمد

قولي له يا ساكن طوس خبر بالضامر إتوقد

صحنك ما خله ساعه و أنا اللي ما إلي أحد

قبة مرقدك تزهر بسناها للعرش يصعد

و آنه اللي هدموا قبري لا قبه و لا مرقد

و قولي له بعد عمك أظن وصلت لك أخباره

ناره إبكل قلب تسعر بعد ما تنطفي ناره

و الزاير لون يقصد ضريحك تغمره أنواره

و عمك يا وسف قبره مثل ليله صفه إنهاره

ضريحه ويه الأرض ساووه و شاهد قبره لحجاره

السلاسل صارن الشباج و الحاجز صفه إمناره

قبل منعوه عن جده منعوا دفنه بكتاره

و نفس اللي إمنعوا دفنه منعوا عنه زواره

قولي له يمن قبرك يزهر نوره بالكونين

تعال و شاهد إبطيبه مراقد من تراب و طين

يمن قبرك صبح كعبه تطوفه الوادم إبكل حين

تعال و شاهد أحبابي عن الزياره ممنوعين

عندك تعتني الأصوات نياحه و صيحت الباجين

و أنا عند قبري منعوهم حته من مصب العين

مو جني الحسن معروف او حبي من أصول الدين

و يكفي ابزايري إبفضله جن زاير أخويه حسين

و قولي له يبن موسه و إحجي ابنبرة الدمعه

بقيع أجدادك يناديك لونك يالرضه إتسمعه

ينادي ياللي تسألني بيمن حاوي الرفعه

و بيمن بقعتك صارت أجل من مكه هالبقعه

يجاوب بالحسن قدري عالي و عندي مجتمعه

ثلاث إبدور ووياهم أظنها فاطمه البضعه

لجن يا وسفه أروي لك خبر دلالك إيفجعه

مراقد عترة الهادي حسره إعليهم الشمعه