للهادي هنينه ... للهادي هنينه

آية محمد فاطمه و هالليله ردد بيها

نزلت على إلسان الوحي صدر النبي يهديها

إقرأ إسمها بالفرح و الفرقه داس إعليها

كل آيه تبدي بفاطمه عطر الفرح ينهيها

و من تنقره الآيه...بيها الصبر رايه

من وقفت إعلينه... للهادي هنينه

نور و نزل من السمه بالمهد صار إوياها

أشرق عله الدنيه فرح ظلمه و شمس ضواها

أم الأبيها إتلقبت ثغر النبي سماها

آية محمد فاطمه بس حيدر اليقراها

سر في معانيها...حيدر كفو ليها

سر و كبر بينه ... للهادي هنينه

مولاتي لو نندل إلج مرقد إله إتعنينه

إنطش الورد في حضرتج أرواح إلك طشينه

لكن إجينه إبكل فرح يم إبنج إتعنينه

يم الحسين إبكربلاء يا فاطمه نادينه

ندري إنتي موجوده...جاب الوفه إوروده

و بالحضره طشينه ... للهادي هنينه

دنيانه و إعيون اليحب في مولدج فرحانه

حته الملايك بالسمه نزلت تهني ويانه

الورد ليلة مولدج ألوانه غير ألوانه

طش عطره لجل إمحبتج و إتعطرت دنيانه

و الحبج إينادي...يا بضعة الهادي

وفينه وفينه ... للهادي هنينه