يغالي جيتك أتوسل...يروح الروح من ترحل...إخذني إوياك ...إخذني وياك

غيابك موت لو طول...بعد عيناك شتحمل...إخذني وياك

إجيتك أشتكي لك و الظهر محني...أنا ما ريد أودعك لا تودعني

تضيع الوالده بعد الإبن يبني...أنا إدخيلك ييمه لا تفارقني

بعد ما ينشف المدمع...أخاف إتروح ما ترجع...صعب فرقاك... صعب فرقاك

تون الروح ما تسمع...أظنها إوياك تتودع...صعب فرقاك... إخذني إوياك

أنا يحسين أمك لا تخليني...إذا ما شوف طولك من عمت عيني

بعد منهو اليظل وياي حاجيني...إذا ما تبقه يمي إوياك وديني

إخذني و إرحم إبحالي...اليصير إوياك يجرالي...ييمه أرجاك ...ييمه أرجاك

أبد ما مرت اببالي...تروح و ينشغل بالي...ييمه أرجاك... إخذني إوياك

مشيت و طار عقلي و ما بقه إبراسي...بعد هيهات أشوفك قال لي إحساسي

ثلاث أولادي فدوه و حته عباسي...فداك و كون ترجع يا أعز ناسي

بنيني الأربعه فدوه...تعال الدنيه ما تسوه...بعد عيناك...بعد عيناك

و حقك يالجنت سلوه...و لا غيرك بعد أهوه ...بعد عيناك... إخذني إوياك

أنام إشلون بعدك و أشعر إبراحه ...تساوه الليل عندي ويه مصباحه

يموت العود من ينشال سباحه ...يموت الطير من يتكسر إجناحه

أعيش إبجمرة مصابك...نسيت الروح بغيابك...و لا أنساك ...و لا أنساك

وفي و ما تنسه أحبابك...أموت و عيني يم بابك...و لا أنساك... إخذني إوياك

دريتوا إشصار بيه و آه لو تدرون ...أشد من لوعتي الشمات من يحجون

سكنت إعله الدرب ها بلكت إتمرون ...ييمه و أيست ما ظنكم إتعودون

إذا ما رد أبو الأكبر...إذا عباس ما يحضر...يظل إهناك ...يظل هناك

أصيح و قلبي يتفطر...عليه الغالي يتأخر...يظل إهناك ... إخذني إوياك

بنيت إبداري خمس إقبور يا يمه ...كتبت أسماءكم كل واحد و إسمه

لجن خامس قبر كل الوكت يمه ...أنا إشعندي دمع أبجيه لأبو اليمه

يرش قبرك دمع جاري...أبد ما تنشف أعباري...أطفي إضماك...أطفي إضماي

أطفي نارك و ناري...انوحن ليلي و إنهاري... أطفي إضماك...إخذني اوياك

ييمه الوالده إشتتمنه معروفه ...إذا ماتت تجي الأولاد ملهوفه

بعد أكبر ولدها حاضر إتشوفه...تفرح لو نعشها إنشال بجفوفه

بقه يتعذر إبلوعه ...ييمه إجفوفي مقطوعه...أظل أنخاك... أظل أنخاك

تسيل إدموعي و دموعه ...حياتي و موت مفجوعه...أظل أنخاك... إخذني إوياك