أنا مضرب مثل للناس بأحزاني أم حسين آني و هذا عنواني

آنه أم المصيبه إبكل معانيها آنه البلحزن كل عين أبجيها

آنه أم القمر كل حاجه أقضيها أبشرك يالذي بالشده تنخاني

وين اللي يون و يشجب العبره يواسيني و يواسي فاطمه الزهره

ينوح إوياي و بحرقه يدق صدره يا شيعه إبدمعكم تطفي نيراني

أنا الضحيت لجل الدين كل غالي و بدمهم يشيعه راسي ظل عالي

بعد عين الكفيل و منحر الوالي صعد موج الدموع و تاه سفّاني

أنوح و فاطمه الزهره تجاوبني نصيح إثنينه إبفد صوت آه يبني

ونين و نوح أساعدها و تساعدني و أصيح إبصوت آه يفراق ولياني

أصيح حسين يبني و ما سكن ويدي و هيه إتصيح يا عباس يوليدي

آنه أصفق بيديها و تصفق بيدي يا شيعه الزمان أشكال راواني

آنه أم الجفيل الأسس الخوه و إثلاثه بعد لحسين هم فدوه

بدموعي يبو السجاد لو تروه لبجي لك لحد ما توقع أجفاني