إشلون أزره الدهر و أفرد بينه أخذ هادينه و بعد مهدينه

إشلون خلانه إبتهاوين و ظنك يا ترانه إبكل وكت تحت الدرك

نطلب من الله و نتمنه الهلك و لا خصمنه إيشوف ذلنه إبعينه

ما الهذا النوح تهوين إيحصل اليمته بينه إتقول للوليه نظل

جم زنيم و زانية و طاغي و نغل يضحك و يومي بإصبعه إعلينه

و إحنه نتصعب و نتجرع المر و نجذب الحسرات لاجنها جمر

و نسجب العبرات لاجنهن حمر دمه و ندمي إصدورنه بيدينه

لو نصفي إقلوبنه و ما نختلف و نجلي عنها الدغش و الكل نأتلف

و بالضعيف إنريف و إعليه إنعطف أيضا و المعسر البينه إنعينه

ما ذهب عزنه و علينه عِله الذل و ما جلسنه إبغير خيمه و غير ظل

و ما تبات إجبودنه إعله إحراب سل و نصبح و نار الهضم تصلينه

ما يفيد الوعظ بينه و ما نفع و كل طبع منه على إهواه إنطبع

لاجن أرد أبرز يفرسان الجزع الصبر غايبنه و حشمه الدينه

يا مصاب الما رمح شره رماك سيدي و ما سهم زل قوسه و خطاك

لا و لا جن حدر ضلعك و بحشاك جرح يوجد جبدك إبسجينه

ساعد الله مهجتك بيها إشكثر طعن يبن العسكري إبرمح و طبر

لا و حق صبرك فلا تملك صبر محل سالم حدر ضلعك وينه

قوم و أمليها عدل بيدك مثل ما ملاها البطل فرعون النذل

و صاحبه السامري و معبوده العجل و قطع المفتون بيها أوتينه

و أذكر و ذكر فعلهم للمله و اليواليهم إبسيفك جندله

سيدي ما ينسه و ما ينسله فدك ورث أمك المتولينه

و بعد أبوها عدل نحبه ما قضه و الوصي ما مدده ولا غمضه

سلوا إسيوف الحقد عالمرتضه و غده الكل منها يتجنه إبدينه