حيرتني بغيبتك وانتظرك ابنار

قوم إخذ راية محمد واطلب الثار

معروفه الاسباب *-* يشرح لك الباب

قوم إخذ راية محمد واطلب الثار

*-*-*-*-*

انت تدري ابغيبتك شفنه العجايب

يعني تبقى اليا وكت يالمهدي غايب

وانت بعيونك شفت هاي المصايب

ياصبر ينفعنه بفراق الحبايب

بنتظارك سيدي الآخر علامه

يا املنه ندعي ترجع بالسلامه

عذبنه الغياب *-* يشرح لك الباب

*-*-*-*-*

البريه ابحبكم الباري امتحنها

هالمحبه ابكل وكت ندفع ثمنها

سيدي والباب خل يشرح حزنها

حتى تسمع ونة الام اعله بنها

لازم تشاهد اثر جمرة دمعها

وانت صيح ابيا ذنب كسروا ضلعها

عن هذا المصاب *-* يشرح لك الباب

*-*-*-*-*

احنه حبينه علي و ماعدنه غيره

واليحب حامي الحمه يرضه ابمصيره

احنه ما نعتب على الميت ضميره

والله بس الرافضيه العدها غيره

بالشوارع سيدي تنزف دمانه

كلها ضدنه وماكو بس انت رجانه

ما عدنه أحباب *-* يشرح لك الباب

*-*-*-*-*

والله يالمهدي خلص دمع النواظر

عن يقين وعن علم غايبنه حاضر

يابو الغيره ابطلعتك جبر الخواطر

هذه شيعتكم غريبه بلايا ناصر

صاحت الزهره قبلنه وين الانصار

كلها سكته وبالصدر جاوبها مسمار

لو رايد جواب ** يشرح لك الباب

*-*-*-*-*

لو نقول الظالم بحكمه تماده

كلها صاحت رافضه وتطلب زياده

اجتمعوا بليل وصدر حكم الاباده

واحنه نبقى نصيح حي على الشهاده

بالسقيفه قرروا هاي العداوه

لا تزال لليوم تصدر هاي الفتاوه

يالعندك إحساس *-* يشرح لك الباب

*-*-*-*-*

احنه اهل المبدأ واهل القضيه

والمحبه الكل بشر عدنا هويه

صاحوا نحلل قتال الرافضيه

صحنه كلا للقتل والطائفيه

من مشه إمقيد علي وبيده فقاره

هذا درس التضحيه اتفهمه الغياره

عن دمع العتاب ** يشرح لك الباب

*-*-*-*-*

بنتظارك ترفع الرايه وتجينه

الزمن والناصبه إنداروا علينه

واحنه نلهج بيك دوم وما نسينه

ياصبر غير الصبر احنه شبدينه

حاربونه وماسكت صوت التحدي

صاحت دموع العتب وينك يامهدي

سهم الغدر صاب *-* يشرح لك الباب