بيدك شفت سيف و أنا بيدي شمعه

إختار إبين الأثنين...بين الدنيه و حسين

جسام يبني

مو سهله يبني شبابك تخسره

ربحك يجسام إمامك تنصره

و الدنيه وحده و تره الموته وحده

و اليعرف حسين يضحي له عمره

عمك ينادي ألا من مجيبه

من توقف وياه تذكره بحبيبه

موت و عيش مرتين...بين الدنيه و حسين

روح بسلامه و ترد بالسلامه

محتاره ما بين دمع و إبتسامه

بالكلفه جسام يشارك عمامه

آنه أشكر الله عله هالكرامه

سيف الحسن هاك ييمه هديه

و إعمامه عندي و ترك لك وصيه

وافي إبكربله الدين...بين الدنيه و حسين

جنت أسهر الليل حساب و تمني

و أنظر جمالك و أغض عيني مني

وياك الحساب ياهالماشي عني

إقعد و أقلك جروحك هذني

أحسب لك إدموع لحد يوم شبابك

كل هذا و إتريد أشاهد مصابك

يوليدي التعب وين ...بين الدنيه و حسين

كل أم يجسام حلمها نعرفه

يكبر إبنها و بيديها تزفه

ما بين الأحباب تحني له جفه

من مثلي زفة إبنها إعله حتفه

يالرايد إتروح أظل إعله نارك

آنه أشعل إشموع و أظل بإنتظارك

تشهد دمعة العين...بين الدنيه و حسين

ودعني يبني و إخذ روحي بيدك

ترجع لي مذبوح يجاسم أريدك

شيبي أصبغه أنا من وريدك

دمع أمك إعليك ييمه إشيفيدك

يم ليلى أمشي تحس بيه أكثر

آنه أنحب إعليك و هي إعله الأكبر

و إنعيش الأمرين ...بين الدنيه و حسين

و الخيمه توقع إذا طاح عمدها

و الوالده إتموت إذا راح ولدها

دمعات الفراق تظل إعله خدها

جلمة ييمه تقطع جبدها

من تلقه شبان تظل تنظر إلهم

يا ربي يا رب تردهم لهلهم

صار الجرح جرحين ...بين الدنيه و حسين

لمن يجي الليل أهيمن ييمه

و الفارق أحباب يغالي إشينومه

ثوب العرس وين يجسام أضمه

يالريحتك بيه أشبقه و أشمه

إفراشك أفرشه و لا تغفه عيني

مذهوله يبني و أحسب تجيني

من أصفق الجفين ...بين الدنيه و حسين

آنه و رباب اويه ليلى قعدنه

زينب دمعها يسيل الدمعنه

بالله يشبان تذكرون تعبنه

بيمن إجينه و بعد بيش رجعنه

كل وحده يبني تنوح إعله إبنها

و إتسولف إشلون طعنها زمنها

آه يا سطرة البين ...بين الدنيه و حسين