بالدار المهضومه إتنادي... وين الأهل يادار

ما واحد ينشد عن حالي ...بس وحشتهم هاي إقبالي...وين الأهل يا دار

هاي العليله الظلت إبها الحاله...إبهجرة حسين امن الوطن و إرجاله

إبيوم الذي عنها طلع بعياله ...بس هالعليله بقت من أطفاله

ظلت هيه ابهاي الوحشه ...و همَّ مشوا بأخطار

عافوا هالدار إبوحشتهم...و بهالدار اتنادي بتهم...وين الأهل يا دار

من قبل هالحاله بوداع الوليان...جانت تشوف الأبو إبصدر الديوان

جانت تشوف الدار جمعت شبان...و جانت تشوف إويه الإبو عمها جان

و لن اليوم و لا تنظرهم...وين إشبول الكرار

جا وين الديوان العامر...ما بيه واحد منهم حاظر...وين الأهل يا دار

جانت إبهالدار العيال إقبالي...و تنشد على وضعي و علتي و حالي

كلها سكوت الدار تتروالي...وين الذي أنظر مجانه خالي

الله اشصار ابهالعيله...و بهاي الدار إشصار

لا هيه و لا أهلي الظلت ...من هالدار إشعدها طلعت...وين الأهل يا دار

بالدار جانت عايله ملتمه...أصواتها عن قلبي تجلي همه

بين الرضيع اللي يناغي إبنغمه...و بين الطفل قاعد يسولف لأمه

و جن لا صوت أسمع من عدها...إبليل و لا ضحو إنهار

لا طفله إويه أمها إتحاجيها...و لليرضع لأمه إيناغيها...وين الأهل يا دار

يا دار مو تضوين جنتي للعين...و هاي الوفود إتروح و إترد لحسين

جاوين أبويه حسين و الإخوه وين ...من بعد ما جنتي إبكواكب تضوين

من بعد الأنوار التضوي...إبدلالي صارت نار

جا هاي النار إشيطفيها...و إفراق أهلي إموجر بيها...وين الأهل يا دار