غيابي وحشه إديارهم ...و آنه أنتظر أخبارهم

من يوم جدوا للسفر...ما رجع من عدهم خبر

و آنه أنتظر أخبارهم

غيابي من الوطن لمن ضعنهم سار

ناديت خلف الضعن قلبي العليل إحتار

بعد الشمل يا وسف ظلت خليه الدار

خلاها ظلمه الوكت بعيوني ليل إنهار

راحوا هلي و عافوني...و بيا وضع خلوني

معلوله و بحالة خطر...ما رجع من عدهم خبر

و آنه أنتظر أخبارهم

لو جان بيدي يصح جنت أمشي وياهم

و شيفيد صبري بعد جتال فرقاكم

و ما عندي منهم خبر و لا وين منواهم

حته أبقه بين الأمل و أترجه و أتناهم

و بالنيه ما قالوا لي...و لا طارش الودوا لي

و أتربه و أشبح بالنظر...ما رجع من عدهم خبر

و آنه أنتظر أخبارهم

لو أدري بيهم رجه أصبر و صبري إيهون

و راحوا أقول إبسفر غيابي و يعودون

و لا بد أقولن هلي عن حالتي إينشدون

و إشلون بيه صحت لو جان ما يلفون

خوفي الجل يدنى لي...و المرض عذب حالي

و الأشد حسبات القهر...ما رجع من عدهم خبر

و آنه أنتظر أخبارهم

ما ظن سده يا خلق بلوه مثل بلواي

أحمل مصيبة هلي أحمل هضم دنياي

أرد أقعد إعله الدرب و أنشد الرايح جاي

خزن جرح علتي و أبعد عليه إدواي

راح الذي إيباريني...و بشوفتك يداويني

و بغيبته جرحي كبر...ما رجع من عدهم خبر

و آنه أنتظر أخبارهم

ناديت يهل الرحم وين اليسرني وين

ياخذ إكتابي إبعجل و يقصد لبويي حسين

إيقله إلك كتبته فاطمه إبدمع العين

قلبي جروح إنمله لا جرح لا جرحين

و ما نمت ساعه إبليلي...و جم حسره هدمت حيلي

و ركس إعيوني امن السهر...ما رجع من عدهم خبر

و آنه أنتظر أخبارهم

لو عندي حيل أعتني لحسين أبو اليمه

و ياريت لو ينقضي باقي العمر يمه

و الوالد إبمنحره و إبصدره لشتمه

و أقعد و أخلي القلب يشجي له عن همه

و قص الوكت جنحاني...و إشلون أصل ولياني

و أشجي إلهم ضيم الدهر...ما رجع من عدهم خبر

و آنه أنتظر أخبارهم