يحسين ودعت الأهل واليوم أجيتك

يحسين أنا البايع الدنيا وشريتك

محبوبي دخيلك .. مشتاق أشتكيلك

أنا البايع الدنيا وشريتك

خل أسولف يالأحبه أمس لمن فجروني

جنت بالمجلس أنادي فاطمة وتهمل عيوني

ألطم وصدري دميته بالزجيه ذكروني

من خلص المجلس رحت ...وباجر أعاود حسبت

لجن يخوتي أستشهدت ...والحبايب شيعوني

توديع... بدموع الحبايب غسلوني

توديع... دفنوني ومشوا وتعذروني

يمفارق خليلك.. مشتاق اشتكيلك

انا البايع الدنيا وشريتك

القبر موحش عليَ خايف ومذهول وحدي

صحت وينك يبوالاكبر هاي دمعاتي اعلى خدي

عاد شفت النور اجاني لن اشوف حسين عندي

ناداني لا تخاف القبر... يالجنت تلطم ع الصدر

اهلآ يآ من تفدي العمر ...واعدت وانا اعله وعدي

وياك... ما أعوفك يا من تفدي لي دمك

وياك ...أمّن لا تخاف حسين يمك

ما يبعد كفيلك .. مشتاق أشتكيلك

انا البايع الدنيا وشريتك

روحي للمجلس يخوتي حنت اعليكم وجتكم

أنتو ماشفتوني قاعد يخوتي وانا شفتكم

واحد واحد أجيكم يالأحبه اتفقدتكم

محد يجي خايف جنت ...ينكسر مجلسنا خفت

والله يا احباب فرحت... من شفت كثرة عددكم

احباب ...ضاعفتوا العدد رغم الخطوره

أحباب... وين الينصر حسين بحضوره

قتلآ في سبيلك .. مشتاق اشتكيلك

انا البايع الدنيا وشريتك

أنا وصيتج يا يمه وما أعذرج لو نسيتي

يمه لا تبجين قتلج وأنا أتذكر وصيتي

أنا ويَ حسين أعيد ومن علي أخذ هديتي

عندي هويه من الولي... مختومه من حيدر علي

كافي البواجي ياهلي... والله فرحان بمنيتي

مسرور ...أنظر زينب وحامي الحميه

مسرور ...ومن مثلي وتحاجيني الزجيه

بجروحي اجيلك ..مشتاق اشتكيلك

انا البايع الدنيا وشريتك