طلعت مثل سرب ...القطه من إخيمها

متقّبعه بضيم ...الزمان و همها

عيله و تودع إخوتها...ما تنوصف حالتها

متقبعه بضيم ...الزمان و همها

هالعيال القبل جانت المثل مطروب إبخدرها

لا شرف يوصل شرفها و لا ستر يوصل سترها

الباري طهرها ابكتابه و الخلق تعرف قدرها

لخيالها محد نظر...متربيه ببيوت الفخر

جدها النبي سيد البشر...و يا وسف غادر دهرها

و صوت الغريب السمعته ناداها

قبل الأجل رايد وداع إوياها

و من طلعت إبحيرتها...ما تنوصف حالتها

متقبعه بضيم الزمان و همها

كلمن إتعنت وليها إتودعه و للخيمه ترجع

إقلوب بالحسرات تلهب إعيون من الهضم تدمع

إبكل كتر صوت المناحه إبكربله هالليله تسمع

هالعيله لو صار الفجر...تفقد أملها و الخدر

و توليها أصحاب الغدر...و من بجاها إشلون تهجع

هالليله بمصابه الدهر هددها

و غير المناحه و البجي إشظل عدها

لو ودعت هيبتها...ما تنوصف حالتها

متقبعه بضيم الزمان و همها

رمله وي جسام قعدت و القلب يبدي عتابه

ربته و تتنظر يكبر بلجي تتهنه إبشبابه

و لو يغيب الولد عنها الوالده إتموت بغيابه

الوالده يبني الربتك...تنتظر ساعة زفتك

إبحسرتي علقوا شمعتك...و الدهر دلالي صابه

إتقله حسبت إبزفتك اتهنه

و يا وسفه بدموعي عجنت الحنه

و من عاتبت سلوتها...ما تنوصف حالتها

متقبعه بضيم الزمان و همها

و ليله للأكبر ولدها إتعنت ابهمها و حزنها

إتقله يالربتك أمك و ما طبق ساعه جفنها

الوالده بآخر عمرها تطلب إرباها من إبنها

يا علي يالردتك ذخر...يا سلوتي التالي العمر

جدامي تنزل للقبر...الجثه تتوله دفنها

ساعة منيتي يالولد ظنيتك

إتفصل الجفن يا سلوتي إتمنيتك

و أمك حلم رادتها...ما تنوصف حالتها

متقبعه بضيم الزمان و همها

و سكنه لحسين أبو اليمه إتعنت إبشكوة العدها

سلوته هاي العزيزه إشلون مهضومه يردها

إتقله يا خيمة أملها و يا ذخر سكنه و ضمدها

يا بويه حاجي سلوتك...إتودعني قلي إشنيتك

عد من أظل إبغيبتك...و الإبو يسمع نشدها

سكنه العزيزه سلوته إمدللها

يسمع عتبها إبحيرته و شيقلها

و قامت تهل دمعتها...ما تنوصف حالتها

متقبعه بضيم الزمان و همها

و زينب العباس إخوها إتعنت و يعثر جذمها

هو التكفل ضعنها و بعهد منه إلتزمها

إشلون من يروح عنها توصل الخيل الخيمها

صاحت يجافل هيبتي...حاشاك ترضه إبدلتي

باجر أظل إبحيرتي...حيره ما ينزاح همها

آنه إختك و إنت الذي إمعاهدني

لأرض الوطن جا منهو خويه إيردني

تبقه إختك إبغربتها...ما تنوصف حالتها

متقبعه بضيم الزمان و همها