إبيا عين أشوفه...إبيا حال أعوفه

دهري بالغرب ذبني...حيرني إبمصاب إبني...إبيا حال أعوفه

أنا الأم الذي بس هالولد عدها...الوياها إجه و إتعذر إيردها

و صعبه من ترد مفجوعه وحدها...عله إهموم الزمن يا هو اليساعدها

آنه و دمعتي...و أجذب حسرتي

و الطف جرحه شيبني...حيرني إبمصاب إبني...إبيا حال أعوفه

أعد أشبار طوله و أحسب أيامه...و عشت طعم السعاده إويه الولد يامه

رغم تعب الربه و حسراته و آلامه...لجن كل أم إبنها إتشارك أحلامه

بأول شبابه ...أنظر مصابه

رجع لي الدهر وني...حيرني إبمصاب إبني...إبيا حال أعوفه

لمن اسم الطفوف إبيثرب إسمعته...حجي عوده الحسن عنها تذكرته

و قلت هذا الخفت منه إجه وكته...قلت يا وسفه جاسم يمكن إفقدته

أصبح غريبه...إبهاي المصيبه

رد إعله القلب حزني...حيرني إبمصاب إبني...إبيا حال أعوفه

و بده قطع النحور إبكربله إقبالي...ووصل سيف المنيه المنحر الوالي

و رخص دمعي الذي ابوكت الشدد غالي...و تصد عيني المجان إوليدي الخالي

و أنظر الجسمه ...إمغسل إبدمه

و أخذ حيفه الزمن مني...حيرني إبمصاب إبني...إبيا حال أعوفه

شفت لمن رجع بيه عمه لخيمه ...إموذر ما عرفته مثل ابن عمه

هويت إعليه و الدمعه غفت يمه...ما فك عينه لي و آنه ألهج بإسمه

دمعي البجيته...منه رويته

و من وني الضلع محني...حيرني إبمصاب إبني...إبيا حال أعوفه

و بقيت إمحيره إبطف كربله بأمري...و من ناده المنادي للسبي إسري

إلتفت إعله العزيز و عبرتي إبصدري...إشلون أمشي و أعوفن دنيتي و عمري

عمري التعبته ...بالطف فقدته

و الحادي الحده إبضعني...حيرني إبمصاب إبني...إبيا حال أعوفه

الأم إشلون عن ثمرة عمرها إتروح...أمشي إبيا قلب عن إبني و إبيا روح

عفت قلبي إعله تربة كربله مذبوح...دم دمعي و جفون إعيوني جنها إجروح

أمشي سبيه ...حقك عليه

موت الفرقه عني...حيرني إبمصاب إبني...إبيا حال أعوفه