يا من تطلب الحاجات .. جد السير و أتعنه

و اقصد سيد محمد .. و أطلب حاجتك منه

حاير لا تظل بأمرك و عندك للحوايج باب

بيها رحمة الباري و ليها الي قصد ما خاب

دونك سيد محمد الما طب حضرته طلاب

إلا و بالمسرة يعود .. منه بغاية المقصود

بيه من يسأل المعبود

دنيا و آخرة ينطيه .. و الهم ينكشف عنه

ساحة حضرته بيها الكل عله دوا و علاج

ما واحد تعناها من عدها سدر محتاج

ما بين السمه و بينه الاملاك السبع معراج

تنزل و بضريحه تطوف .. و الزوار قبره تشوف

توقف على الباب صفوف

كل زاير يحيونه .. و يبشرونه بالجنة

الزاير لو لفه يحيوه من يسدر يودعونه

و يشكرون سعوانه بالجنة يبشرونه

عيسى إنجان للاعمى رد النور لعيونه

أهو اشجم اعمى من طب ليه .. رد بساع نوره عليه

جم واحد عدل رجيله

و بفضله و براهينه .. تشهد شيعة و سنه

معاجز ظهرت إلجوده ما تنحصى و ما تنعد

بيها أهل السما تدري كل أهل الأرض تشهد

يا من تطلب المعروف دونك سيد محمد

بضعة من علي الهادي .. شع بنوره الوادي

طب بحضرته و نادي

يا سبع الدجيل أنخاك .. و حاشى تخيب الظنه

شل هلوادم إعليكم يشراف العرب يمجاد

خلوكم شتت بالبر و منكم كل قبر ببلاد

وصه المصطفه بيكم و هم سووا عكس ما راد

يا هو اللي ما قضه بالسم .. جبده إنمرد و اتخذم

حتى الطفل ما يسلم

و العريس من عدكم .. بدم النحر يتحنه