إخوه إويه حسين سفرتهم...للطف تدرين سفرتهم

كافي دمع الوداع...ربيتيهم إسباع...للطف تدرين سفرتهم

يا أم البنين أقمار ودعتي إبليالي الهم ...يضوون إبليالي حسين و يحرسون المخيم

وصيتهم إبزينب لا تعطش لا تتألم ...و تدرين السفر هذا بيه إيقدمون الدم

خل إتشوف الناس رايتهم ...بيد العباس رايتهم

و براية الكرار...هالأربعه الأحرار...للطف تدرين سفرتهم

يا أم البنين إوداع ووصيه إويه أربع إبدور...ردتيهم لخوهم عين و الزينب أخوهم سور

زينب ما ربت بخيام زينب رابيه بخدور...و ردت أهل الوفه إيضحون من أجل العقيله إنحور

يمها إينصبون خيمتهم ...لا ليبعدون خيمتهم

فّي إلها يصيرون ...و للعيله يحرسون...للطف تدرين سفرتهم

يا أم البنين إبدور ودعتيهم إبصبرج...و يمسح هذا أبو فاضل بجفوفه دمع عمرج

صارت عينج إبعينه و حط راسه على صدرج...آخر شوفه للعباس هو و إخوته إيخبرج

جن ميعدون نيتهم ...بالطف يقضون

يا أم أربع إجروح ...صبري و صبري الروح...للطف تدرين سفرتهم

يوم الطف قبل هاليوم بيه إسمعتي و إدريتي...و من صلب البساله أبطال للطف إنتي ربيتي

إبهاي الفاطمه و حيدر يوم السفره وافيتي...ودعتيهم و بحسين كل سائل توصيتي

تدرين إشلون خوتهم ...بالدم يوفون خوتهم

و إيضحون الأعمار ...دون ابن حامي الجار...للطف تدرين سفرتهم

عن عينج ضعنهم غاب و أعليج الحزن قادم...بس هم جنتي تتمنين يرجع هالضعن سالم

اولادج ترد إردود ويه الأكبر و جاسم ...و إعيونج تشوف حسين جفه إبجف قمر هاشم

إترد للأوطان عيلتهم ...من غير أحزان عيلتهم

بس هذا الأمل مات ...يا أم الكرامات...للطف تدرين سفرتهم

يا أم البنين إشلون غياب المنايه إتعود ...من بعد الكواكب هاي تهريها الليالي السود

تدرين و خبر عندج تعطش بالطفوف إجبود ...يا أم صاحب الرايه لا رايه تظل لا جود

لا ماي إتشوف طفلتهم ...و إتظل بالخوف طفلتهم

من إتضحي الأبطال ...تعطش كل الأطفال...للطف تدرين سفرتهم

يا أم البنين إنجوم ليلج ما بعد تطلع ...تنزف بالطفوف إنحور تضوي الساحة المصرع

إهناك الرايه تتخضب إهناك إجفوف تتقطع ...إهناك ينذبح عطشان حته البلمهد يرضع

برض الآلام نومتهم ...لا مو بخيام نومتهم

تنزف أطهر أبدان ...ظل إنتي للأحزان ...للطف تدرين سفرتهم