اسأل وين .. وآنا ابحيرة

عن حسين .. مو عن غيرة

جاوب لاتحيرني .. مو عالاربعة أخبرني

عن حسين .. مو عن غيرة

لاتشرح أكثر يالحادي .. شوف أبحالي أشسوى البين

أسئل عن حسين أوليدي .. جاوب وتهل دمع العين

عبدالله وجعفر يالحادي .. كلهم فدوة لوجه احسين

من سمعت عباس أنهارت .. قامت تصفق بالچفين

فدوة تروح كل ويلادي .. لأجل حسين روح الهادي

حست بالهضم روحي .. وأسمع صرخة أجروحي

عن حسين .. مو عن غيرة

قال إلها حسين أعلى الغبرة .. عاري أو ظل بلا تغسيل

وخيول أعداك رضت صدرة .. وعالايتام أتدوس الخيل

ولاخيمة الظلت عد زينب .. ولا حامي الظل بس عليل

ردت مكسورة ومهضومة .. بس دموع الحرقة أتسيل

كون أوياك قطعوا نحري .. من فرقاك يجدع صبري

ماأريد العمر يبني .. جوابي للأيناشدني

عن حسين .. مو عن غيرة

أنا وصبري لليل غيابك .. ودموعي وحسرة فرقاك

وأتئمل ترجع يوليدي .. ماتسوى الدنية أبلياك

وصويت أشبولي يضحولك .. دمهم يرخص لأجل دماك

كافل زينب نور عيوني .. أعرف ماقصر وياك

يعباس رفعت راسي .. ينبراس لأهلي وناسي

نعمة الناصر وحامي .. يوليدي القلب دامي

عن حسين .. مو عن غيرة

بعد الراحو من عيوني .. ماظل غير الون والنوح

والمثلي يعيش أويه جروحة .. ويطول ليل المجروح

أنا أم القطعوا چفينة .. وانا أم حسين المذبوح

أي ودموعي ونار أحزاني .. أنحب لمن روحي تروح

يسعر دوم نار أمصابه .. كل محروم من أحبابه

بعدك مانمت ليلي .. دمع العين يحچيلي

عن حسين .. مو عن غيرة

يوليدي و كل يوم أبني لك.. كوم إتراب امن الأحزان

و اتصور قبرك و اشكي لك.. شكوت ضايع و الحيران

و أبجي الحد ما قبرك يغرق.. بلكت يتروه العطشان

يالضايع مني و ضيعني.. بين المدمع و النيران

ليل إنهار تجري إدموعي ..تسعر نار بين اضلوعي

تلهب من يطفيها..حسره و جرحي يرويها

عن حسين .. مو عن غيرة

كل نظره الطفلك أحسبها ..من جمرة قلبي الملهوف

يحسين السيف الحز نحرك.. منه إبعيني اتنام إسيوف

روحي إتصيح الصوت أطفالك ..عشت اوياهم ليل الخوف

إنته النور و لو ما شوفك.. ما ينفع يالغالي الشوف

ليل اهموم ليل أحبابك..راح النوم بعد إغيابك

خوف ووحشة اسنيني..و انشد من يدليني

عن حسين .. مو عن غيرة

سهم الصوب قلبك يبني.. بس قلب الأم يتلقاه

و الزهره التعرف آلالامي.. نفس الحرقه و نفس الآه

عميه الخيل الرضت صدرك ..رضت ضلع أمك وياه

علمت الروح اعله الونه.. يوم إمصابك ما أنساه

جاري الماي نار ابصدري..ظلت هاي الآخر عمري

ضامي و ما شرب منه..و أيامه القضت ونه

عن حسين .. مو عن غيرة