مدرسة طف كربله إتخرج رجال خرجت سبعين للعالم مثال

مدرسة أخلاق و إتعلم القيم حسين خط المنهج و سيفه القلم

و فوقها العباس إبو فاضل علم و بيها موجود الجواب الكل سؤال

بيها فرعين إنبنن هالمدرسه فرع بيه الزلم و الثاني النسه

منهج النسوان زينب درسه و خرجت للدنيه رباة الحجال

إحتفلت إبيوم التخرج بالطفوف و الشهاده إنختمت إبختم الحتوف

إسيوف بيها إنرسمت و نحر و جفوف و بقت مطبوعه عله إخدود الرمال

و إمتحان الطف جمع شيب و شباب الجاوبت حفظت تعاليم الكتاب

و يوم عاشر بالدمه جان الجواب و نجحت السبعين من صار الجدال

إتوازت إعله إحتوفها جنها إبعرس و الفخر للدرس و إنطه الدرس

يا هو أكرم من اللي يضحي النفس و مثل أنصار السبط يوجد محال

يوم عاشر من بزغ فجره و صبح إتسابقوا عالموت و اليسبق ربح

إمتحان و بيه جم واحد نجح ناجح الناده إعله المحتم تعال

كربله عرضت مواقف حاسمه و بيها عالسيف إنتصر سيل الدمه

فازت أنصاره شبل حامي الحمه و أصبحوا إسطوره واقع مو خيال