يناعي المسلم إمصاب...إخذ من منحره إجواب

يا ناعي إبرقبتك دين...سلامك وصله لحسين

إخذ من منحره إجواب

يناعي إمصاب مسلم وصل أخباره

عليه قلب الهواشم ما طفت ناره

و خل عيناك دمع أحزان تتجاره

و صيح إبصوت يا هو الياخذ إبثاره

و لهله وصل أخبار...و صيح إبهاشم الثار

عليها إتحتم البين...سلامك وصله لحسين

إخذ من منحره إجواب

جد إبمهرتك و إتحزم إبهمه

يناعي و خضب الجفين من دمه

و من توصل راويهن لبن عمه

و قله إجواب مسلم دم يبو اليمه

سفيرك عالترب طاح...إسيوف إتقطعه و إرماح

و عله إبطيحته الدين...سلامك وصله لحسين

إخذ من منحره إجواب

و خبر حسين عنه من بقه الوحده

لا ناصر يعينه و لا إخو العنده

الإخو يحتاج إخوته إبساعة الشده

ترد عنه المصيبه و توقف إبحده

نزف بإسمك يريدك...إتحضر شدة عضيدك

يصيح أهل الوفه وين...سلامك وصله لحسين

إخذ من منحره إجواب

وقف وقفت علي و إتحزم إبصبره

و خله إجيوش أهل كوفان متحيره

و بيمناه إيدب اليمنه عاليسره

غدر يا حيف مسلم طاح بالحفره

مسلم واحد ووصار...جيش إبعين الأشرار

وحيد و ما إله إمعين...سلامك وصله لحسين

إخذ من منحره إجواب

طبع أهل الغدر من يوقع الجيدوم

مثل طبع الذياب إتظل عليه إتحوم

مسلم كل كتر منه تسيل إدموم

و مثل حيدر علي جتفوا إيديه القوم

مثل حيدر ولينه...إنجتف مسلم يمينه

و تحيطه الكوفه صوبين...سلامك وصله لحسين

إخذ من منحره إجواب

يناعي و هيج إعله حسين أحزانه

و إوصف حال مسلم بين عدوانه

و من قربت منيته إشرتل إلسانه

ودى لك سلامه إبطيب وجدانه

مسلم من وقف صاح...عله هونك يذباح

أسلم و أغمض العين...سلامك وصله لحسين

إخذ من منحره إجواب