يوم أحزانك هذا اليوم ...ذبحوا مسلم يا مظلوم

قطعوا نحره...أهل الغدره

ذبحوا مسلم يا مظلوم

صاحوا كل زلم وديت مسلم ليهم بأمرك

صاحوا بالرسايل بيه تلقانه وفه إيسرك

صاحوا عدنه هاي إسيوف ضد الظالم إتنصرك

لن أول خبر يوصل جرحوا بيه قلب صبرك

لن مسلم محد يأويه...و إسيوف إيجردوها إعليه

إشلون إتنصره...أهل الغدره

ذبحوا مسلم يا مظلوم

يحسين الذي بايع هو اللي طلع ينقم

صاح ابمسجد الكوفه هذا اللي كتب إقدم

و بمجان الذي حيدر صابه سيف ابن ملجم

هو رايد إبسيفه بيه يقطع نحر مسلم

بمجان الصلى الكرار...صاح إنذبح هذا الثار

دمه إتفجره ...أهل الغدره

ذبحوا مسلم يا مظلوم

يحسين و طلع مسلم وحده إيواجه الأخطار

هيجي خلته الكوفه حر إبين ألف غدار

إشلون إتريده يستسلم و هو ابن إخو الكرار

خلاهم مثل غربان من إتشاهد الصقار

شمرة حيدر من إتشوف...ما تثبت أبطال الخوف

حفروا حفره...أهل الغدره

ذبحوا مسلم يا مظلوم

مسلم صارع الفرسان كلها إسيوف غداره

هذا امن السطح يرميه ضميره إبهيئة إحجاره

و ذاك إشقد حمل أحقاد قلبه و يقطف إبناره

و مسلم جسمه كله إجروح و يمك ظلت أفكاره

ينزف بس كل خوفه إعليك...تغدر يدري الكوفه بيك

و هاي المره...أهل الغدره

ذبحوا مسلم يا مظلوم

إسيوف الكوفه بيه حاطت و كلها إتطالب إبدمه

ما ظل جسمه بيه إمجان ما ينزف يا بو اليمه

عطشان و جريح و هاي فوقه إسيوف ملتمه

بالحفره هوه يحسين و إتمنه إخوته يمه

مسلم بين الوادم هاي...يسقوه موت إبدال الماي

من إتأسره ...أهل الغدره

ذبحوا مسلم يا مظلوم

مسلم بيه ظفر طاغي إشلون المسلم يعوفه

ما خايف على نحره منه إعليك كل خوفه

و فصلوا راسه عن جسمه ريت إعيونك اتشوفه

سحبوا جسمه بس راسه إلمن ودته الكوفه

جثه إبلا راس إيسحبون...و المن هالجثه إيعرفون

إعليه منتصره ...أهل الغدره

ذبحوا مسلم يا مظلوم

هذي كوفة ابن ازياد كلها إسيوف تنتظرك

عن مسلم يبو السجاد يوم التضحيه إيخبرك

سيف الحز نحر مسلم يحز ابكربله نحرك

و ناس السحبت الجثه هيه اتهشمه الصدرك

هم إيظل جسمك مطروح...هم راسك ليزيد إيروح

و هم منتظره...أهل الغدره

ذبحوا مسلم يا مظلوم