للشدد تحضر يحيدر...ردتك الهلشدة تحضر

شبلك إقبالي ذبيح...و آنه محتاره و أصيح...ردتك الهلشده تحضر

هذا ليل إدموع و إهموم و ألم...و إحنه يا با الحسن أيتام و حرم

لا زلم ظلت و لا ظلت خيم ...بويه حته الطفل منهم ما سلم

حزني طال...و الرجال...عالرمال...دمها سال

خيم الليل إبظلامه...و حايره ابهاي اليتامه

بالهضم قلبي جريح...و آنه محتاره و أصيح...ردتك الهلشده تحضر

بويه مثل إمصاب أهلنه ما جره...الروس قطعوها و جثثها إعله الثره

و آنه بالعيله صرت متحيره...أنظر النار إبخيمنه إموجره

عايله ...إبكربله...إموجله...و ذاهله

وادم الذبحوا زلمنه ...يا علي حرقوا خيمنه

عالحرم دمعي يسيح ...و آنه محتاره و أصيح...ردتك الهلشده تحضر

بويه ما عندي قلب يحمل غرب...جم و جم لوعه تحملها القلب

إقبال عيني طاح الأكبر عالترب...و مثل دمعي شاهدت دمه يصب

نوره غاب...بالمصاب...راسي شاب...قلبي ذاب

طاح الأكبر بالحرايب...داسته إخيول الكتايب

و الجسم بالدم سبيح...و آنه محتاره و أصيح...ردتك الهلشده تحضر

بويه خمس إسهام دلالي جمع...هضم و إفراق و ضمه و خوف و جزع

من شفت جسام عالغبره إنصرع...إلزمت و خفت لا قلبي يقع

شمعته...إبخيمته ...و جثته ...إبحومته

من طفوا شمعة شبابه ...بويه خلاني إبمصابه

أنهض و أعثر و أطيح ...و آنه محتاره و أصيح...ردتك الهلشده تحضر

هذا ليل أخطار و إدموعي تسيل...أصرخ و انخاك يا حامي الدخيل

بس حرم ظلينه و أيتام و عليل...إبدار غربه لا محامي و لا كفيل

و القمر...عالنهر...ابهالخطر...ما حضر

وليه يا بويه إنولينه...و الكفلنه إمن المدينه

عالنهر جسمه طريح...و آنه محتاره و أصيح...ردتك الهلشده تحضر

مر علينه إنهار موحش بالطفوف...يبو الحمله و ريت عيني لا تشوف

هجمت إعله حسين غارات الصفوف...و قطعوا جسمه يحيدر بالسيوف

حسين طاح...دمه ساح...و صوتي صاح...عزنه راح

من عقب ما سال دمه ...داست الخيل إعله جسمه

و ما بقه مفصل صحيح...و آنه محتاره و أصيح...ردتك الهلشده تحضر