يالعاهدنك منعوفك ...للموت اوياك منعوفك

يحسين سجلنه العهد ...وياك و إنت التعلم

هالعهد صفحه إمسجله... و متوقعه إبفيض الدم

مضمونه منعوفك أبد ...و بكل زمان إمترجم

ترجمنه هذا العهد بإسمك يحسين

ما نبتعد مهما تمر بينه إسنين ...حبك نجاة و مكرمه دنيه و دين

دستورك دستور الهادي...بإسمك هاي الأمه إتنادي

و من بايعناك منعوفك ...للموت اوياك منعوفك

من عالم الذر مبدأك... مفروض صار إعلينه

و من بين الأصلاب إنتقل... حبك الطاهر بينه

إبدور الرضاعه من المهد... من حبك إتغذينه

و إنشأنه و إدركنه الحياة الحره

و بجامعة ذاتك درسنه الثوره ...و إترسخت يحسين بينه الفكره

هالفكره إبحق إدرسناها...فكرة إيمان إعرفناها

و نتبع مسراك منعوفك ...للموت اوياك منعوفك

أدوار مرت كل عصر... يظهر خصم يتحده

يمنعنه عن إزيارتك ...و يصب علينه حقده

و إحنه بإرادة ثابته... إبكل صوره نوقف ضده

قال اليزور حسين يدفع أموال

و إحنه رخصنه المال و إدركنه الحال...نتسابق إعله إزيارتك ضد القال

إتحدينه الظالم و أعوانه ...ما همنه إشما صب ضغيانه

و رغم العاداك منعوفك...للموت اوياك منعوفك

إتعنينه قصد إزيارتك... برواحنه المشغوفه

و ما همنه ذاك اللي منع ...و لا نترهب من خوفه

و صدر أمر ثاني الذي... يزورك يضحي إجفوفه

صرنه إنتسابق حته ننطيك إجفوف

ما همنه أمر الطاغي ما هزنه الخوف...أوصلنه الضريحك بالدمه إكتبنه إحروف

و إحروف الدم من تقراها...تدري و تعلم شكتبناها

و هالدم ناداك منعوفك...للموت اوياك منعوفك

من شافنه الطاغي إبشغف ...لزيارتك نتعنه

هزه الشعور الجاهلي ...صدر أوامر منه

ثالث أمر منه صدر ...لو ردت تنشد عنه

هالأمر من أجل الزياره إتحتم

نادانه كل عشره التجي وو تقدم...تنذبح تسعه و منها واحد يسلم

و إحنه إتعنيناك القبرك ...إنواسيك إبقطعت نحرك

من تابعناك منعوفك...للموت اوياك منعوفك

هالصوت يإبن المصطفه... إبجوف النحور إيناديك

و هذي شرايين الجسم... يإبن الرسول إتحاجيك

إتقلك رخصت إلنه الدمه... إشلون إبدمه إنعز إعليك

ضحيت من أجل الشريعه إبدمك

يا ريت جنه إبساحة الطف يمك...أجسام نرخصها قبل ضيحت جسمك

يالضحيت إبدمك إلنه...يا حيف إبيومك ما جنه

و لو جنه إهناك منعوفك...للموت اوياك منعوفك

وسفه وحيد إبكربله ...و لا من معين إيعينك

و بمصرعك لمن طحت... ذبلت أوراد إسنينك

و إنقطعت إحبال الوصل ...بين العيال و بينك

و الحرم يا مظلوم من عفتوها

هجمت العسكر و العده سلبوها...و إخيامك إبنار الظلم حرقوها