ما طاح مسلم عالأرض عرش الظلم طاح

دنيه الطمع ما غرته لا أهل الأطماع

هذا العزيز الما قبل للذله ينصاع

للمعتقد قدم جهد و الجهد ما ضاع

ما عنده كل راية حرب و إيريد الإصلاح

للكوفه مسلم من إجه إيمثل إمامه

لو ينذبح ما ينكسر واحد كلامه

و حسين أبو اليمه إيعرف قدره و مقامه

تم إختياره إلها السبب للكوفه من راح

مسلم أصيل إبموقفه و أصل إنتسابه

من أكثر إبيوت العرب شيمه و صلابه

أهل الكرم و المرجله أهل النجابه

كل فرد من عدهم أخذ بالملحمه إوشاح

عدهم عداله و معرفه و عدهم فراسه

و إعله القبائل إلهم إتلوق الرياسه

مسلم إبنهم ما يطخ للذله راسه

لا همته إسيوف العده و طعنات الرماح

لو قلنه جان الوحده ما بين الأشرار

من عنده لمن يعتذر مقبوله الأعذار

يدبر إشلون و يعتذر وارث الكرار

صيحة علي عقد الوله بأهل الغدر صاح