يا حيدر جزه إحدوده صبرنه...بالهم و الحزن خلص عمرنه

و القبرك يراعي الزود ...يا يوم اليجي و إنعود

بالهم و الحزن خلص عمرنه

نتذكر الماضي إبمثل هالليله ...و يهيج الألم و المدمع إنسيله

و المثلك يحيدر حامي إدخيله ...لو ضاقت علينه الوسعه نشجيله

عندك نشتكي إبلوعة قلبنه ...و غيرك محد اليسمع عتبنه

و إنت التعرف المقصود...يا يوم اليجي و إنعود

بالهم و الحزن خلص عمرنه

يا با الحسن جنه إبمثل هذا اليوم...مثل سرب الحمام إعله الضريح إنحوم

يا عون الفقير و ناصر المظلوم...يا خيمة ملاذ الخايف المهموم

يا والي اليتامه و حامي جاره ...دنيه و آخره منوانه داره

و إعليك النظر مشدود...يا يوم اليجي و إنعود

بالهم و الحزن خلص عمرنه

من نرفع عتبنه بألم و ابلهفه...يا حامي الحميه قدرك إنعرفه

عندك يا ولينه تسهل الكلفه ...و دارك لليتامه إبكل وكت ملفه

حلال المشاكل صاحب الغيره...و الينخاك حاشه يوقع إبحيره

ياليمنتك بحر الجود...يا يوم اليجي و إنعود

بالهم و الحزن خلص عمرنه

يا عصاة موسه و يا سفينة نوح...يالقبرك إبنوره من بعيد إيلوح

لو ما تفزع إلنه بعد وين إنروح...و إحنه إنقول ما يبقه حمل مطروح

يا عقد الوله البابك قصدنه ...يا باب الندقه لو تردنه

و إنت حجة المعبود...يا يوم اليجي و إنعود

بالهم و الحزن خلص عمرنه

لو رايد وضعنه إتعرفه يا بو حسين...هاك إسمع جوابه من دموع العين

غربة عمر طالت مو سنه و سنتين...و ما ندري بعد ننطي الوجه لاوين

ذلينه بعد ذيج الكرامه ...و إعلينه الوكت خيم ظلامه

مخلص بينه ما موجود...يا يوم اليجي و إنعود

بالهم و الحزن خلص عمرنه

نعشك يا علي للقبر يوم إنشال...يا راعي العداله إنشالت الآمال

و بأيد الحرامي صبح بيت المال...جا يا هو البعد يفقد ضعيف الحال

تسهل عالشهم قصت وريده ...و تكلف لو يمد للذله إيده

و إيريدك عليك إتجود...يا يوم اليجي و إنعود

بالهم و الحزن خلص عمرنه

يا حيدر العايش بالترف شبعان...ما يهتز ضميره و يذكر الجوعان

يا حامي الدخيل و مجسي العريان...فيض علينه بإحسانك يعالي الشان

ضاقت يا علي و إنت أملنه...و منك ننتظر تجمع شملنه

يالتدري الصبر محدود...يا يوم اليجي و إنعود

بالهم و الحزن خلص عمرنه