ماتت يا ناس ...مهضومه إخت العباس

زينب من أمها ...ورثت هضمها ...إخت العباس

يا روح المثل زينب ضيم و نايبه شافت

مثل زينب جذب هيهات إخت لو والدها ناحت

وسادتها الحزن و الهم و على حزن الخلق فاقت

الزمن ما يوم فرحها من إنولدت لَمن ماتت

جرح الأيام ...ظل يلهب جرح الأيام

ينزف آلالام ...من زينب جرح الأيام

محنت ألمها ...ورثت ألمها

زينب من أمها ...ورثت هضمها ...إخت العباس

الوادم تتضرب الأمثال إبحزن يعقوب و الخمسه

و لو حي النبي يعقوب جان إبزينب إتأسه

واحد فاجد و زينب لا واحد و لا خمسه

جم يوسف نطت زينب و بالطف غربت شمسه

إبدم الشبان ...و إخوتها إلدم الشبان

سجلت عنوان ...محنتها إبدم الشبان

إبهمهم و همها ...ورثت ألمها

زينب من أمها ...ورثت هضمها ...إخت العباس

إبتدت محنتها يوم الغاب جدها المصطفه المختار

و بعد فقد النبي شافت إبداره إشلون شبت نار

و شافت أمها خلف الباب ضلعها صوبه المسمار

و أخوه المحسن إتشوفه من إتنقطر إبباب الدار

إمصايب و إهموم ...ورثتها إمصايب و إهموم

من ذاك اليوم ... شافتها إمصايب و إهموم

عندك علمها ...ورثت ألمها

زينب من أمها ...ورثت هضمها ...إخت العباس

و عوضها فقد أمها علي الكرار والدها

إبحنانه ضمها و بعطفه و كل أمنيته يسعدها

و زينب من بعد فتره أماني إهوايه تفقدها

فجعها الدهر بالكرار و عليها أحزانه جددها

فقد الكرار ... فقد أمها فقد الكرار

و غدر الأشرار ... يتمها فقد الكرار

إبغدرة خصمها ...ورثت ألمها

زينب من أمها ...ورثت هضمها ...إخت العباس

بعد حيدر أبو الأيتام راواها الدهر طشتين

طشت بيه جبد أبو محمد و طشت بيه راس أخوها حسين

محنه من بعد محنه تنطي الوجه زينب وين

فقدت كل أهاليها و المن جا تدير العين

عالشاطي إتشوف ... حاميها عالشاطي إتشوف

من غير إجفوف ... واليها عالشاطي إتشوف

إبحرقه تشمها ...ورثت ألمها

زينب من أمها ...ورثت هضمها ...إخت العباس

المصايب كلها ورثتها من أمها فاطمه الزهره

و غدت زينب تقابلها إبحلم المرتضه و صبره

و البت زادت إعله أمها و فاقتها إبمحن كثره

عاشت ويلي مظلومه و ماتت تالي بالحسره

عاشت لوعات ... غربتها عاشت لوعات

إجفوف الحسرات ... دفنتها إجفوف الحسرات

خلدت إسمها ...ورثت ألمها إجفوف الحسرات

زينب من أمها ...ورثت هضمها ...إخت العباس

هذي زينب الكبره و هذي إهمومها يا ناس

رغم الهضم من العدوان ما ذلت و دنقت راس

عله إفراش الأجل و إتصيح وين حسين و العباس

جفنها طبقته إعله الضيم و خمدت زينب الأنفاس

إمصابج بالروح ...يا زينب إمصابج بالروح

خلانه إنوح ...يا زينب إمصابج بالروح

إبرمية سهمها ...ورثت ألمها

زينب من أمها ...ورثت هضمها ...إخت العباس