إنت ابن الإمام الشرف الكعبه و يزيد ابن الطليق الما عبد ربه

يحسين لا منعوفك يحسين إحنه إسيوفك

يحسين إنت جوهر آية التطهير و خل تترك دجلها التدعي التفسير

دم نحرك فضح كل زمرة التزوير و الصارت عله الأعقاب منقلبه

يومك بيه فضحت العبدو الأوثان و الأسسوا دوله البيت أبو سفيان

عاشورك يبو السجاد ظل ميزان و بطفك أجيال أجيال تتربه

طفك مدرسه و الما درس جاهل و الما بيك ينجن هذا مو عاقل

دين الله بأبوك المرتضه كامل و بيك إنحفظ هالدين و أخذ رتبه

يا شمس الحقيقه إشلون نتوهم و إنطاوع السيف و إحنه عدنه الدم

عرفنه إشلون بينه الجرح يتكلم عرفنه إشلون حيدر فاز بالضربه

يومك صار للعز و الشرف مقياس و علمنه إعله راس الرمح يعله الراس

رايتنه إسمها راية العباس و إحروف الكرامه إعليها منكتبه

مثلك شيعتك يحسين ثوريه رفضنه أهل التسلط و العبوديه

فهمنه من العليل القيد حريه و من زينب عرفنه تسهل الصعبه

ضحينه و بعد من أجلك إنضحي من إختك الحره إدروس نستوحي

ما تمحي إبذكرها القوم ما تمحي مثل زينب نظل إنردد الخطبه

إبصوت أم الخدر ذلينه جم طاغي و ما نركع السيف الخارجي الباغي

دمنه الدم وريدك سيدي يناغي و الرگبتك فدوه إتروح كل رگبه

نتعناك و بطول الدرب ممشه إذا زرناك زرنه الخالق إبعرشه

تحضرنه نعرفك ليلة الوحشه و اليعتب إلك مضمون إله تعبه