حته الزهره إتكون الشاهد... يا سيد الأكوان

و إخذ نظره ...يبو الزهره ...يا سيد الأكوان

عن أمتك يالمصطفه أحجي إبدموع و الآلام

بعدك عدل ما ودعت نصبوا سقيفه الظلام

رفضوا وصيتك يا أسف و اتآمروا عالإسلام

ما قبلوا البيعه العلي ترفض عبيد الأصنام

أخذوها و قالوا بالشوره... و إنقاد الكرار

ما راعوا كل حرمه و بابك ...شبوا بيه النار

بقت جمره...يبو الزهره ...يا سيد الأكوان

هجموا عله الدار إبحقد و البضعه جانت بالدار

لاذت وره الباب و بعد عندك خبر يالمختار

كسر الضلع ما ينجبر شاهد يظل المسمار

عصروها و المحسن وقع و بغمده ظل الفقار

نعرف داحي الباب و عزمه ...و يعرفه الميدان

لكن قرر صابر يبقه ...و يظل للآذان

جبل صبره...يبو الزهره ...يا سيد الأكوان

غصبوا فدك يالمصطفه و قالوا علي مو أول

هذا الحصل من أمتك وي كل وضع تتبدل

و الما رضت بالمرتضه هالأمه لازم تندل

و الدخلت إبدينك طمع غير الحكم ما تقبل

حيدر يبقه و يبقه الأول ...بالدم إموقعين

و الما يرضه إبحيدر أول... لا دنيه و لا دين

نطيع أمره ...يبو الزهره ...يا سيد الأكوان

عود النبت بأرض الحقد و إتغذه منه الأكباد

بيك النفع ما يرتجه شارب حليب الأحقاد

ندري إبفعل هند بأحد و غذت إبنها إبيا زاد

ذاك الحقد منهج يظل يتوارثونه الأحفاد

ذاك اليتفاخر بأفعاله... و يقطع راس حسين

نعرف أفكاره و تربيته ...و نعرف أصله من إنين

أهل غدره...يبو الزهره ...يا سيد الأكوان

سبطك يطاها إبكربله سبعين ألف طلعوا ليه

و إنت إبحديثك بينت يآذيني كلمن يآذيه

بعد الذبح بعد السلب خيل العده إتدوس إعليه

قالوا خرج عن ملتك و هذا إنتصار إتسميه

و الأمه الما رادت سبطك... و إتريد ابن إزياد

لازم يرفضها البيه غيره... فشله و ما تنراد

ولا تبره...يبو الزهره ...يا سيد الأكوان

ماضينه يشهد بالألم و إتضاعف إبحاضرنه

و ابهالمصايب سيدي بس حبكم يصبرنه

شفنه العجب من أمتك ما شفنه من ينصرنه

بين الظلمنه إبفتوته بين الذي إيفجرنه

و اليذبح عشره من الشيعه ...حق يتعشه إوياك

ذنب الشيعه إتحب العتره ...و إتعادي العاداك

صفت كفره...يبو الزهره ...يا سيد الأكوان

عاهدنه ما نترك علي لآخر نفس نبقه إوياه

و المحسن و كسر الضلع ثار و ابد ما ننساه

فدوه لبو اليمه النحر قطع النحر نتمناه

هاي الكرامه و هالشرف بس إبهواكم نلقاه

ما نتغير و إنت الشاهد ...عن حب أهل البيت

و إحنه إبطوع أمرك يالهادي ...و إنت اللي وصيت

عله العتره ...يبو الزهره ...يا سيد الأكوان