وينه حماي الحميه... ريته يحضر...وينه حيدر

ما دره إبضلع الزجيه ...من تكسر...وينه حيدر

وين ليث الغاب حيدر ما حضر يم فاطمه

وينه يوم البسمه صاحت بالحميه إتحشمه

وين راح الضيغم اللي بيه معقود الحمه

وينه و الزهره تريده يحضر ابهالموزمه

وين عن هاي الرزيه ...جيه مينغر... وينه حيدر

وين طاعون الحريبه بحيله شالصار و سده

ما لفه للزهره لمن هجمت اعليها العده

وين عزمه ما يردهم يوم حاديهم حده

وجر الدار و عفاها باللهيب إموقده

وين أبو النفس الأبيه ...داره تسعر...وينه حيدر

وين داحي باب خيبر باب داره ما حضر

باب داره وجروها بلجي ما عنده خبر

ما دره إبضلع الزجيه إبدفعة الباب إنكسر

بس عجب حيدر ميدري عالحميه ما قدر

يدري لاجن بالوصيه... ويلي يعثر...وينه حيدر

وين فلال الكتايب وين شيال اللوه

عزمه وينه ووين سيفه المنه جم فارس هوه

وين ما شاف الزجيه و الضلع منها إلتوه

تنشد اعله الطود حيدر إشلون حيله ما قوه

هالعتب غصبن عليه... للغضنفر...وينه حيدر

وين رجف الموت وينه الما سكن رجفه و هجع

فاطمه إتصيح الظليمه إشلون حيدر ما سمع

فضه صوب الزهره فزعت ليش حيدر ما فزع

إشبيه و الزهره تنادي يا علي محسن وقع

إتصيح فضه لحقي ليه ...وحدي مقدر...وينه حيدر

وين صمصام الغوالب وين راح المرتضه

الما رضه الجاره مذله إشلون للزهره رضه

تنهصم وهيه الوديعه و جفنه عنها يغمضه

بالقهر و الضيم و الهم هالعمر منها إنقضه

و رفرف إجناح المنيه ...و إلها سّدر...وينه حيدر

و إحنه لو جينه إبعتب كلمن أبده عتبته

لو حجينه و لو قسينه لنه نعرف شيمته

شيمت البيها ربينه و حشمتنه النخوته

بس مصاب الزهره قاسي بينه تلهب جمرته

جمرة الزهره سريه... بينه تسعر...وينه حيدر