هذا السيف ابيمناي...خل تسمع قوم إعداي

يا زينب شنهو الماي

آنه صنديد المعارك والدي ليث البريه

عودي حيدر بطل خيبر قلع باب الخيبريه

و آنه مثله اليوم جفي قلع أبواب آل أميه

إشحده يا زينب اليدنه صول إحدود الثنيه

سور الحرب معمور و إتشاهديني

دون المنايه ايلوح سيفي إبيميني

و الأمضه من السيف صارم يقيني

و شما تكثر هالقوم ...أحصدها إبسيفي اليوم

يا زينب شنهو الماي...و همت حيدر وياي

عايله إمشيد خيمها و إنصبت ستر الفواطم

هالخيم حشمه و مهابه و أصبحت كعبة مكارم

كعبة و إتشيد ركنها بالرماح و بالصوارم

نزلت الأملاك بيها طافت إعليها الهواشم

هاشم إجت بحماي للطف حرمها

و بيدي إنصبت أستار حشمت خيمها

وشحدها قوم إعداي تتدنه يمها

سيفي بيد الفرسان ...لو تقرب للصيوان

يا زينب شنهو الماي...هالعايله إبرجواي

للحرب يا بت محمد لو هتف صوت المنادي

ينفجر طوفان اميه يطفح إبصارم جهادي

هالمهر يصبح سفينه إيفاوج إبدم الأعادي

هذا سيفي و هذا مهري عالعزم صار إعتمادي

عازم أخوض الموت و بجفي رايه

و بالحومه مهري إيخوض بحر المنايه

ويه الأعادي اليوم أنهي الروايه

صرخه و تسمعها الناس...أبرز و آنه العباس

يا زينب شنهو الماي...عاقد عالموت الراي

زينب إستمعت لخوها و إرتفع صوت العقيله

نادته يا قمر هاشم يا من الخدري كفيله

حست العيله إبعطشها و الطفل ذايب دليله

هاك إخذ جودك يخويه للطفل خمد غليله

و العيله يا عباس عندك خبرها

مذهوله بالصيوان تايه فكرها

زاد العطش و إقلوب يسعر جمرها

ظلت أطفال حسين ...يمك مشبوحه العين

يا زينب شنهو الماي ...و إنت التسمع شكواي

من سمع زينب تحشمه غضب و إهتزت الرايه

قلها يا زينب إشهدي اليوم أدوس إعله المنايه

لو أجي و للماي أجيبه و أروي القلوب الضمايه

لو أسد ماي الشريعه و أقطع العلقمي و مايه

قال إلها عد عيناج هالرايه تشهد

حي آنه و إتعطشين يا بت محمد

لا و حق رب الكون و اللي توحد

لجل الماي إتشوفين...أرخص لج هالجفين

يا زينب شنهو الماي...و سيفي إيحقق منواي