صارت علم ...والبيه ألم ...ينشد طبيبه

كلما قسى ويايا الدهر وبوجهي سد الباب

يا كربلا لارضج احن يا ريحة الاحباب

من ابتعد عن ترتبتج بجفون اشيل تراب

بيه الامل بيه الشفا مو بس حزن ومصاب

بيه ذكرياتي ... عمري وحياتي

اقسم قسم...والبيه ألم ...ينشد طبيبه

لو سافرت وتغربت يبقى القلب وياج

وابقى انتظر فوق الجمر ما ينحمل فرقاج

يا كربلا والشرفك واشرف ارض خلاج

لهفة طفل ضاع بغرب واتلهف لملقاج

بين المناير ...ظل قلبي طاير

قلب انجسم ...والبيه ألم ...ينشد طبيبه

طبع الشمع من يشتعل تخلص دموعه

وحال النهر لمن يجف تبجى على حاله القاع

بعدج اظل مثل السفن تاهت بلا شراع

مهما حصل ابقى الوفي واليشتري وما باع

لو ما قبلتي ... حبي ولهفتي

اصبح عدم ...والبيه ألم ...ينشد طبيبه

دمعي فلا مثله دمع غير التعرفه الناس

يشبه دمع ام الخدر لمن وقع عباس

فتوة محب ارض الوفا مو بالجدم تنداس

لازم زحف نوصل الج يا من رفعتي الراس

انتِ البداية ...حسن النهاية

والما فهم ...والبيه ألم ...ينشد طبيبه

اشتاق الج دمعة وجرح واصرخ واضمج اه

غيرج شفت واتولعت فترة وقدرت انساه

من المهد حبج كبر بيا وكبرت وياه

اصعب مرض ماله شفا هذا التراب دواه

انتِ بضميري ... يمج مصيري

لا مو وهم...والبيه ألم ...ينشد طبيبه