لا لا تلوموها .... خل تبجي خلوها

روحي الحزينه اليوم .... يم الجواد اتحوم .... خل تبجي خلوها

مصيبه و إلها دمع الصخر يتفجر .... ثقل همها يصدع هيبة المرمر

عله امصاب الجواد الروح ما تقدر .... الصخر ما صبر روحي اشلون تتصبر

اتركوها ابهواها و خلها تتكدر .... اشما تكثر نوايحها الولم يكثر

بالحزن مالومه .... حايره و مهمومه

ابنوح و كدر و اهموم .... يم الجواد اتحوم

ابفقد تاسع إمام اتكدرت هالروح .... مثل موت الجواد الها الممات ايلوح

مثل نوح الإبل ظلت عليه اتنوح .... عله امصابه تون ونت حمام الدوح

تمنيت الأجل بابه إلي مفتوح .... و قبل روحي الجواد مني اتروح

خل تبدي ونتها .... خل تشكي حالتها

خلوها تبقه دوم.... يم الجواد اتحوم

انخسف بدر الجواد و هالدهر سمه .... خطف نجماته نجمه من بعد نجمه

يجود ابروحه ما واحد حضر يمه .... لا إخوان عنده و لا بني عمه

ثلثتيام مرمي اعله السطح جسمه .... و روحي اتحوم يمه و تلهج بإسمه

و بشدة اللوعه .... مهضومه مفجوعه

تنحب عله المسموم.... يم الجواد اتحوم

بذل قلبي الجواد اعله الصبر جهده .... نفذ سم الظغينه و فطروا جبده

يقاوم لوعة السم و الهضم وحده .... و إجه شبله علي الهادي حضر عنده

حفر لحده و بقت روحي تحن بعده .... تمنت لو يسدوها ابنفس لحده

ما ترجه دنياها .... رادت مناياها

و ابلهفة المضيوم.... يم الجواد اتحوم

اندفن تاسع إمام ابجمرة اصوابه .... تمنت روحي لو دفنوها بترابه

قضت كل العمر من بعده مرتابه .... تغيب نور وجهه اشمصعب اغيابه

القلب هيهات يحمل لوعة امصابه .... هضم فقد الجواد الها القلب صابه

زاد القلب نوحه .... لا تلجم اجروحه

و اجروحه تجري ادموم.... يم الجواد اتحوم

عله امصاب الجواد ايشب جمر همي .... و ما ظل ركن سالم بعد من عزمي

اعله فقده اينوح دمي و عظمي و لحمي .... و تنحب كل مسامه و كل عضو ابجسمي

ابكل حيله الدمع فوق الوجن يهمي .... عساني لا بده ابجو القهر نجمي

و ابشفرة آهاتي .... مذبوحه نجماتي

و اليوم أشوف انجوم.... يم الجواد اتحوم