على عيونج يزينب حلم مذبوح كل عينج دمع بس ما بجيتي

بچيتي جروح طهرتي المسافات كل خطوة يسر منبر بنيتي

يا هيبة علي دخلت على يزيد خورزتي الزلم و اتسيديتي

نظرات الزعل بعيونج سيوف ذو الفقار صوتج من حجيتي

سفينة هم سريتي ببحر الدموع على ساحل مصايبهن رسيتي

اسمحيلي يزينب اسأل اليوم انتي هواي من اتحمليتي

لأن مجبور اسألچ عاليأذيچ و ادري بيا مكان اتألميتي

اسألچ يالغريبة و چلچل الليل و حارس للحرم انتي إلبقيتي

اشوفچ چان بيدچ معصب يلوح احلفچ بالضلع إلمن نخيتي

نخيت إلكافلچ مقطوع الزنود معذورة لأن وحدچ صفيتي

مشيتي بغير طولچ خاف ينشاف ضم روحه النهر لمن مشيتي

كل جرة نفس وياها عباس لاچن من وصلتي له اشلقيتي

غمضها السهم وحدة من العيون بس الثانية اتشوفچ اجيتي

صفت انتي وكفيلچ محد وياچ مسموح العتب لو عاتبيتي

شقلتي له يزينب قوم وياي وياه جلمة عتب بيها ابتديتي

اشقلتين له يزينب وين الوعود مو انت إلقت قومي بحميتي

عمود البيت انت الشايل البيت تدري من يطيح يصيح بيتي

شقلتي له يزينب قوم وياي من شفتي الزنود اتعذريتي

صحتي بشاربك آنه يعباس ما رف شاربه من حشميتي

راويتي يزنب زرقة المتون لو لا بسهم عينه التهيتي

لو مديتي ايدج تلزم الايد من شفتي الزنود اتعذريتي

قلتيله الخدر يا ابا الفضل راح حرقوا خيمتي و طبوا ثنيتي

قلتي له صحت وينك يعباس يضحك شامتج و اتسلبيتي

كل هذا الحچي ما ينهض وياچ قمتي بيا جرح من أيسيتي

على طولج جرح لمن تقومي مثل حسين من قمتي انحنيتي

رجعتي إلمن رجعتي بس الايتام يسألونج يعمة شو بطيتي

اعرفج بت علي قد هاي الاحزان مثل عباس يا زينب وفيتي

نعم فوق الهزل و الرووس وياج نعم عقب الخدر ذاك انسبيتي

بس الكل تشوفج اسد مجروح كلها اتميل عنج لو مشيتي

اعذريني يزينب لا تزعلين و آنه بدمعتي اتبين هويتي