إوداع زينب يا علي الوليانها زلزل السبعه و فتك بركانها

خابر ابزينب يوالدها الفحل اشما عليها امن الزمان إشجره و حل

ليل عاشر ودعت كل الأهل مثل متودع الحموله أوطانها

قامت و لحسين واليها مشت لفت صيوانه و عله حسين أدخلت

سلمت لاجن على راسه إوقفت شافته يتلو ابسور قرآنها

قام لمن شاف زينب ليه لفت حيه بيها لاجن اعيونه اسجبت

امحيره و عن جانب الساره إجلست عرف ما بيها و علم بشجانها

نادته يا سورنه و عز لسلام ما ترخصني يضيغم يضرغام

أرد أسولفلك يبو اليمه كلام و يقصر إختك من تراك إلسانها

هاتي ما بحجاج يا زينب جمين و خبريني بيه ولا تتوجلين

يا سلوتي و بضعتي و ذاك الجنين اشلون روحي إتميل عن سلوانها

نادته يحسين منزلنه إبدرك و صرنه يبن المصطفه حدر الشرك

و ما ترى لك فرج من هذا الضنك حته عايلك تسدر أضعانها

و بال العراق إتحسب يحسين خير لا و لاجن ما تجد غير الشرير

جيش سبعين ألف بيكم مستدير دورة إبياض البصر بإنسانها

و إنت ما وياك من جمع البشر غير سبعين و حزب سبعه و عشر

و قبلتك دنياك و إجيوش الدهر و الزمان و كل عبيد أوثانها

و الأشد مشكل يبن فحل الرجال عندك ابهالمنزل الموحش إعيال

حرم ما تعرف سوه العز و الدلال و جيف بصرك بالنسه و رضعانها

و العرض يحسين ما دونه العرب للطبر و الطعن تجثي اعله الركب

من سمعها أكظم و بيه لاح الغضب لاجن إسترجع لأمر رحمانها

و صاح يا زينب يبنت ذاك الندب حقج إطلبتيه و الحق ينطلب

لاجن إصغي لي و أخبرج بالسبب متخفاج أسرارها و تبيانها

ما يزينب بطر طلقت الديار و لا نزلت الكربله دون إختيار

لاجن الباري عليّ أومه و أشار إبعالم الذر من قبل أكوانها

و أخذ من عندي أخذ عهد و سند و جدي بيه و المرتضه عودي شهد

و قال لي هالدين اوياك إتحد عالدنيه و قومها و شيطانها