يحسين أنصارك تدرينه يحسين أنصارك تدرينه

أنصارك إحنه و الخطر داهمنه و لو تشتعل سوح الحرب ميهمنه

تدرينه أبوك المرتضه امعلمنه معنه الوفه و ما يحوج إتحشمنه

بس للحومه إنطب خلينه يحسين أنصارك تدرينه

ليل الحرب خيم علينه و عسعس يحسين بس خل الصبح يتنفس

ما تلقه بينه غير بس الأشوس و باجر عرشنه ابكربله يتأسس

و تشهد بت الزهره اعلينه يحسين أنصارك تدرينه

صورنه بالأصلاب تدري الجبار خدام إلك يبن الزجيه و أنصار

و بمدرسة حيدر درسنه الآثار سلمان قدوتنه و رمزنه عمار

قدوتنه الصانوا والينه يحسين أنصارك تدرينه

إتعلمنه منعوفك لون نتوذر من ميثم التمار و من الأشتر

و بصبر أبو ذر عالشدد نتصبر صفين كون ابكرله تتكرر

و حيدر كون إنرد صفينه يحسين أنصارك تدرينه

المقداد لو بين ولائه و أعلن عابس إبحبك يبو اليمه إتجنن

و مالك لون بالدم صحائف أعلن باجر حبيب ابكربله يتفنن

و من الضدك ياخذ ديَنه يحسين أنصارك تدرينه

و الزينب إنقلها العقيلة حيدر عن نصرة الأمجاد ما نتأخر

يا بت علي ميهمنه هذا العسكر اشما بالعدد يكثر بعد خل يكثر

لعضيدج إحنه إنقر عينه يحسين أنصارك تدرينه

و بهذا يوم الملحمه الثوريه للدهر تبقه العاقبه المرجيه

ما طولنه اويه الحق عقدنه النيه خل ينعم التاريخ بالحريه

و الحاضر يذكر ماضينه يحسين أنصارك تدرينه