و انعاتب...يالغايب...صار الضلع ضلعين

ياالمهدي جنه ابكل عتب نذكر مصاب الزهره

و نشرح مصيبة فاطمه و ضلع الوديعه و كسره

هالنوب إجتنه كربله و شفنه الجثث عالغبره

مو ضلع واحد سيدي اضلوع أصبحت متكسره

كسرك صبح كسرين...شبحت إلك جم عين

ننتظرك ...و انخبرك...صار الضلع ضلعين

جنه قبل نشرح إلك ضلع البتول و يومه

و نستهض ابكسرة ضلع بنت النبي المظلومه

و لمن ذكرنه كربله و جدك تسيل ادمومه

امن الزهره شفنه مو ضلع كلها أصبحت مهشومه

بين الوديعه و بين...صدر الغريب حسين

جم لوعه ... مجموعه...صار الضلع ضلعين

يا المهدي ياخذنه العجب بالزهره من نتذكر

و انقول دار أم الحسن ليش ابلهب تتوجر

لن كربله اتوضح صور نار ابخيم تستعر

و ما ندري يا نار الذي جمرتها تحرق أكثر

يبن الحسن دارين...بيهن تشب نارين

ما تطفه ...و لا تخفه...صار الضلع ضلعين

من أثر مسمار الهضم صدر البتول اتصوب

و اصوابه للطف انتقل خله الضماير تلهب

صوب صدر سبط النبي و طاح ابدماه امخضب

و أصبحن مسمار و سهم ما ندري يا هو الصعب

صاب الدهر صدرين...و اتنازفن جرحين

من دهرك ...شيصبرك...صار الضلع ضلعين

و فاجعة محسن بالدهر للحزن فتحت بابه

لمن سقط من فاطمه اهتز العرش لمصابه

و نفس المصيبه ابكربله انعادت و نفس اصوابه

من رموا عبدالله ابسهم و دم نحره صار اخضابه

و بقلبك اصوابين...لمصيبة الطفلين

و شتصبر ...من تذكر...صار الضلع ضلعين

وادم الظلموا فاطمه و من الفدك حرموها

نفس الأمر بالطف حصل للخيم من قصدوها

سلبوا اخدور ابكربله و عيله ابيسر مشوها

لو ما سلب ذاك الفدك للعيله ما سلبوها

ما نعتب اعله البين...ندري الأساس من انين

امن الزهره ... و العتره...صار الضلع ضلعين