بعدنه عالعهد لسا بعدنه وفينه و احنه غير الوفه اشعدنه

يزينب يا غريبه يزينب يا غريبه

بني غالب لفوا عند الصواوين صاحوا صوت وين أم الخدر وين

يزينب آمري لمرج مطيعين وصية حيدر إبخدرج و بالدين

علي وصانه و إكتبنه وعدنه نعاهد و أبد ما نخلف عهدنه

يزينب يا غريبه يزينب يا غريبه

و حق عينج يزينب نكشف إهموم أبد لا ترهبج لو جثرت القوم

أفلاك الحرب لو دارت اليوم نحجل خيل أميه إبفيض الدموم

نصد كلمن وقف ضدنه و جحدنه و أميه بالحرايب ما تردنه

يزينب يا غريبه يزينب يا غريبه

الحرايب من تدور اعله المنيه بحر من دم تصير الغاضريه

عله إحدود الشرف نصبح ضحيه و نقدم للخدر دمنه هديه

جم يوسف اللي ينذبح عدنه حزنج حزن يعقوب إبفقدنه

يزينب يا غريبه يزينب يا غريبه

يزينب إحنه للميدان عينه و مثل دور الجفن داروا علينه

و احدنه عصت موسه إبيمينه و فرعون و جنوده إمطوقينه

فرعون العصر يعرف قصدنه و من عالم الدر إحنه إنرصدنه

يزينب لو سمه الميدان غيم يطب من الأعادي مطر من دم

إشحده اليوصل إحدود المخيم نضحي و بس خدر هاالعيله يسلم

خيم محفوظه بيها إعيال جدنه الحماية هالخيم نبذل جهدنه

يزينب يا غريبه يزينب يا غريبه

إبربيع المعركه و روض الشهاده إخوتج ماكثه إبحجر السعاده

و راعي الوفه ما يقصر جهاده يضحي اشما ملك لجل إعتقاده

نضحي و بالهمم نحفظ مجدنه و إحنه الساحة الطف إنوجدنه

يزينب يا غريبه يزينب يا غريبه

يزينب نشتري الدين إبدمانه و على تاج الشرف يرفل لوانه

دين المصطفه نكسب ضمانه و الينطي المناحر ما سوانه

نفوز و ندخل الجنة خلدنه إبشهادتنه و هالآثار إنفردنه

يزينب يا غريبه يزينب يا غريبه