إذا بإسم الأولاد ايصير الزماط ... هذا فخر بس حماي الدخيل

خله القال عندي بالحجي افراط ... دعدني للوصي من المخابيل

لون عباس إبنه اعضيد الاسباط ... يستاهل وصف كل المراجيل

هذا العله صدره اتلوق الأنواط ... شجاعه و علقوها ابدرعه الثجيل

إذا بالمهد جان ايقطع القماط ... تصور لون يكبر هم إله اجبيل

يوم غاص بيها و بالزلم غاط ... رادت كربله من قاعها اتشيل

مدها اعله الشريعه مد السماط ... ترس بيها الفرات الزلم و الخيل

انشبج تموز حرها ابرد لشباط ... من زود أخو زينب شافت الويل

حست بالجحيم ابحر لمطاط ... حقها الما درت ويا من اتعيل

(كفها امن الشاطي ابصولاته)

شمس وجهك تطر من زور الرماح ... و تجي الخيمة زينب اتجيب الصباح

ما يشيلك سمه و من حده اوسعت ... لو يشيلك عله الشاطي ما طحت

غاب بيك السمه و انت ما غبت ... غطه روحه ابرايتك رايد وشاح

رايتك صارت وتد هاي الأرض... و من تطيح الدنيه بجفوفك تكض

تنسبط هاي البسيطه و تنخفض

ميزان الدنيه ابجفينه

تعبت حيل الوغه و ما تعبك ... و لاذت الحومه ابطرف من شاربك

تعكر الجيمان عكرت حاجبك ... و من يحل عكرتك لو شك السلاح

الهسه عينك تربي لحسين الأبي... يا ابن أم البنين اليعربي

فاطمي و هم حيدري و هم زينبي ... و نور وجه الحسن من قبتك لاح

و بخزرة عينك مرعوبه

اسحبت قاع المعركه سحب السمط ... و افرشتها اباب خدر اخت السبط

عاشت ازنودك يقطاع القمط ... يالسطرتك بجت اعيون الصياح

ازنودك الطاحن مناير قبتك ... و الهسه يبجي العلقمي يم جربتك

من عطش مايه و شرب من دمعتك

تتلاطم قامت جرفينه

طبعه القمر يطلع من يجن الليل و كل الناس ايشوفونه

و طبعها الشمس من تطلع تجيب اليوم و شجان بأمسها الخلق ينسونه

بس وجه القمر عباس ما يعرف نهار و ليل

و لو صد للسمه عين الشمس تنزل تلوذ ابطارف امتونه

هذا من جماله يوسف أهل البيت يسمونه

لجن خل نرد الزود فعله و نوصف افنونه

عباس كثره ابحبه مجنونه

تغار اعليه عين الشمس و الحومه ابعزم صولاته مفتونه

إجه ايذكر الناس ابدر وين الإجت تاخذ ثار عتبه و تطلب اديونه

أشو ضاعت ابعج الخيل من ساعه الذهلها ابخزرة اعيونه

صرخ من صرخته فلش اقراب السيف و بسيوف العده ايقطع المسنونه

اهتزت كربله و بالسمه صوت ايصيح مو زلزال هذا ابن الصميده اعصرجت اسنونه

و افتر الكون ابدولابه