زينب تنخت بالقمر جافلها هاك إسمع اشقالت له وشقال إلها

قالت له يا من قلت قومي امشي اوياي آنه جفيلج يختي و انتي البلحماي

و اشبجت جف ايمينك ابجف يمناي و الناقه بيدك عدلت محملها

يختي يزينب قالها اشتقولين عباس اخوج آنه الغيور و تدرين

قلي لي اشعندج طلب وشتردين لو طلبتج فوق الثريه يوصلها

قالت له منك و النعم يا عباس يا بو الشهامة و الفخر و النوماس

يا خويه اعرفك بالشدد رفعت راس حملة علي حملتك من تحملها

ايقلها يزينب و حق ضلع الزهره هاليوم يوم اللي جنت أنتظره

موقف لسجل و الأجيال تذكره و عالنهر أكبر ملحمه لجعلها

قالت له يا بحر البعيد احدودك طوفان من تطفح يا خويه ابزودك

ما صدق ايمسنه الهضم بوجودك نشجي الضمه و جا بعد غيرك شلها

ايقلها يا بت حيدر تطلبين الماي حسبالي عندج طلبه أكلف من هاي

و آنه اخوج البكلايف وفاي يم الخدر طلبتج يا مسهلها

شد و لكد مهره و قصد للحومه و ظهر الحرب شافت القوم انجومه

و ذكرهم بحيدر علي و بيومه حين الصرخ خيل و زلم جفلها

بالخندق و حرب الجمل ذكرها و جنحينها فوق القلب كورها

ساعه يلمها و ساعه ليطشرها صاحت الغوث و كربله زلزلها

خلاها ناس اتدوس ناس ابلا شوف و ما تدري تشرد وين من كل الخوف

جذامه تركع قامت اصفوف اصفوف و سيفه مثل خزل الغنم يخزلها

شط الفرات اتملكه امن الصوبين و من مايه حين اللي غرف بالجفين

ما شرب منه من ذكر جبد حسين و دمعة وفه عالوجن قام يهلها